امریکا یو ځل بیا د ملګرو ملتونو دامنیت شورا غونډه کې په غزه کې له اوربند سره مخالفت کړی، خو له اسراییل یې غوښتي دي، چې عملیاتو کې د ملکي وګړو خوندیتوب ته پاملرنه وکړي.
تېره شپه د غزې د و روستي وضعیت په اړه د ملګرو ملتونو د امنیت شورا غونډه جوړه شوې وه او ګډونوالو پکې په غزه کې د اوربند غوښتنه وکړه.
خو د راپورونو له مخې، امریکا په غزه کې د اوربند غوښتنه رده کړه او دامنیت شورا له ۱۵ غړو څخه یوااځې امریکا مخالفت وکړ او بریتانیا په رایه کې ونډه وانخیسته، خو ۱۳ هېوادونو د اوربند ملاتړ وکړ.
سرچینې زیاته کړې، له رایې اچونې وروسته په ملګرو ملتونو کې د امریکا استازي رابرټ ووډ وویل، د اوربند لپاره د امنیت شورا طرحه په چټکۍ جوړه شوې او په اړه یې مناسبه مشوره نه ده شوې.
نوموړي ټینګار کاوه چې هېواد یې د داسې اوربند ملاتړ نه شي کولای چې د بلې جګړې تخم شیندي.
د چین، فرانسې، روسیې، جاپان او ګڼو هېوادونو استازو د امریکا دغه پرېکړه نهیلي کوونکې وبلله.
د چین سفیر امریکا په دوه مخې تورنه کړه چې له یوې خوا د جګړې پای ته رسول غواړي او له بلې خوا د اوربند مخالفت کوي.
د روسیې استازي بیا به دغه ورځ “د بشریت په تاریخ کې توره ورځ” وبلله او وايي تاریخ به د واشنګټن پر پرېکړه قضاوت کوي.
د ملګرو ملتونو سرمنشي له رایې اچونې مخکې د امنیت شورا غړو ته ویلي چې دغه وړاندیز ته مثبته رایه ورکړي.
د ملګرو متلونو عمومي منشي انتونیو ګوتېرېش د غزې روان وضعیت په تړاو د امنیت شورا ور بلل شوې غونډې ته خپله وینا کې وویل چې د بېړني اوربند لپاره خپله رایه وکاروي.
هغه زیاته کړه: “د غزې خلک په یوه وژونکي توپان کې راګېر دي، نړیواله ټولنه باید له هرې ممکنې لارې د دوی دې غمیزې ته د پای ټکی کېږدي.”
نوموړي دغه راز غوښتنه وکړه چې بشري دوستانه اوربند ته رایه ورکړل شي، څو د ملکي خلکو ژوند وژغورل شي او هغوی ته بېړنۍ مرستې ورسول شي.
بلخوا د امریکا د بهرنیو چارو وزیر انتونی بلینکن له اسراییل غوښتي دي، چې په غزه کې د عملیاتو پر مهال دې د ملکي وګړو خوندیتوب ته پاملرنه وکړي.
د روان کال داکتوبر له اوومې نېټې راهیسې په غزه کې د جګړې له پیلېدو راهیسې هلته شاوخوا ۱۷ زره فلسطینیانو ژوند له لاسه ورکړی او زرګونه نور ژوبل شوي دي. دغه راز ویل کېږي چې تر ۱۵۰۰ پورې اسراییلیان هم وژل شوي او درې زره نور ژوبل شوي دي.
Views: 11
