یوې سرچینې ویلي، چې امریکایي پلاوي په اسلام اباد کې د خبرو اترو پر مهال د افغان کډوالو د اېستلو پر پروسې اعتراض نه دی کړی، خو غوښتنه لري چې دا پروسه دې ورو کړی شي.
افغانستان لپاره د پاکستان ځانګړي استازي اصف دراني د لېندۍ په ۲۴مه، پر اېکس شبکې لیکلي، چې د امریکا د بهرنیو چارو وزارت د مرستیالانو او نورو دیپلوماتانو په ګډون پلاوي سره یې په اسلام اباد کې ولیدل.
هغه زیاته کړې چې په دې دوه ورځنیو خبرو اترو کې یې د افغان کډوالو پر ستونزو او د هغوی د بیا ځای پر ځای کېدو پر موضوعاتو یې خبرې کړې دي.
بلخوا د امریکایي پلاوي مشرې د بهرنیو چارو وزارت د نفوسو او کډوالو چارو مرستیالې جولېیټا والزنویس هم پر اېکس شبکې له پاکستاني پلاوي سره دلیدنې عکس خپور کړی او ورسره یې لیکلې دي چې دواړو لوریو د افغان کډوالو پر بیا ځای پر ځآی کولو او خوندیتوب باندې یې خبرې کړې دي.
امریکایي او پاکستانیو چارواکو ددې لیدنو کتنو په تړاو نور جزییات نه دي خپاره کړي.
په واشنګټن کې دامریکا د بهرنیو چارو وزارت مطبوعاتي دفتر د وصال ټلوېزیون د یوې پوښتنې ځواب کې یواځې همدومره وویل چې پلاوی اسلام اباد ته تللی او نور جزییات یې شریک نه کړل.
بلخوا ځینو پاکستانیو سرچینو ډیوه راډیو ته ویلي، امریکایي پلاوي پر دې ټینګار کولو چې هغه ۲۵ زره افغانان د پاکستان لخوا بېرته افغانستان ته ونه لېږدول شي، چې امریکا ته دتګ په تمه په اسلام اباد کې شپې سبا کوي.
سرچینې زیاته کړې، پاکستان هم نه غواړي دغه افغانان بېرته خپل هېواد ته په زوره ستانه کړي.
د سرچینې د معلوماتو له مخې، امریکا له پاکستانه د افغان کډوالو داېستلو پر پروسې اعتراض نه لري، خو غواړي چې په ژمي کې دا پروسه ورو کړی شي.
تر دې مخکې د پاکستان بهرنیو چارو وزارت ویاندې ممتاز زهره بلوڅ ویلي وو، چې درې امریکایي پلاوي په روانه اونۍ کې پاکستان ته سفر کوي.
هغې زیاته کړې چې یاد پلاوی به له پاکستاني چارواکو سره د افغانستان پر ستونزې او یو شمېر نورو مهمو موضوعاتو خبرې اترې وکړي.
د پاکستان بهرنیو چارو وزارت ویاندې دغه راز ویلي، د افغانستان لپاره د امریکا ځانګړی استازی ټام ویسټ هم راتلونکې اونۍ اسلاماباد ته سفر کوي او له هغې وروسته به یو بل امریکایي پلاوی هم راشي.
امریکایي پلاوي په داسې حال کې پاکستان ته سفر کوي چې په دې وروستیو کې د کابل او اسلاماباد اړیکې د ترهګرۍ او کډوالو پر موضوعاتو ترینګلې شوې دي.
پاکستان ادعا کوي چې ترهګر د افغانستان له خاورې پر دوی بریدونه کوي خو افغانستان تل دا ادعاوې رد کړې دي.
بلخوا پاکستان له تېرې میاشتې راهیسې په زور د افغان کډوالو ایستلو لړۍ هم پیل کړې او تر اوسه یې شاوخوا څلور سوه زره افغان کډوال په زور ایستلي دي.
Views: 11
