د صنعت او سوداګرۍ وزارت وایي، د کراچۍ له بندره د افغان سوداګرو د ترانزیتي توکو درې زره بند پاتې کانټینرونو ته د ترانزیټ اجازه ورکړل شوه او د لېږد بهیر یې پيل شو.
د صنعت او سوداګرۍ وزارت په خبرپاڼه کې راغلي چې دغه کانټینرونه د پاکستان د نوې ترانزیتي تګلارې په پایله کې د روان میلادي کال د اکټوبر له درېمې د روانې نومبر میاشتې تر ۱۶مې درول شوي وو.
دغه راز د افغانستان، پاکستان او ازبکستان تر منځ په درې اړخیزو خبرو اترو کې د ګډون په موخه د افغانستان د صنعت او سوداګرۍ وزارت سرپرست نورالدین عزیزي په مشرۍ یو لوړ پوړی پلاوی د تېرې لړم میاشتې په ۲۲مه پاکستان ته تللی و.
سرچینې لیکلي چې یادو کانټینرونو ته د لېږد اجازه ورکول، یو له هغه مواردو و چې د یاد سفر په ترڅ کې پرې بحث شوی و.
دغه وزارت لیکلي چې د ترانزیټ په برخه کې د افغان او پاکستاني چارواکو د دوامداره خبرو اترو په پایله کې د یادو کانټینرونو پر لېږد تفاهم وشو او د انتقال بهیر یې پیل شو.
Views: 14
