د یوه ورځني کرکټ نړېوال جام سیالیو په لړ کې افغانستان پاکستان ته ستره ماتې ورکړه او ددغه هېواد پر وړاندې په یو ورځنیو سیالیو کې دا لومړۍ بریا وه.
دغه لوبه د دوشنبې په ورځ (د لړم په لومړۍ نېټه) د هند په چینایي ښار کې ترسره شوه، د لوبې پچه پاکستان وګټله او د توپوهنې پرېکړه يې وکړه.
د پاکستان لوبغاړو په محتاطه توګه ښه لوبه پیل کړه، خو د پیل د لوبغاړو تر سوځېدلو وروسته یې نورو لوبغاړو ډېره سسته لوبه وکړه او یو وخت اټکل کېده چې پاکستان به ۲۵۰ منډې وکړې، خو وروستیو لوبغاړو شاداب خان او افتخار احمد تیزې منډې وکړې او پاکستان وکولی شو چې افغانستان په د ۲۸۳ منډو هدف ورکړی.
د پاکستان له لوري لوبډلمشر بابر اعظم ۷۴، عبدالله شفیق ۴۸، افتخار او شاداب ۴۰،۴۰ منډې جوړې کړې.
د افغانستان له لوري په توپ اچونه کې نور احمد لکڼوال چې په لومړي ځل ورته په نړېوال کې چانس ورکړل شوی و، په خپلې لومړۍ لوبه کې یې د پاکستان درې مهم لوبغاړي وسوځول، دغه راز نوینالحق دوه، محمدنبي او عظمتالله عمرزي بیا د پاکستان یو- یو لوبغاړي وسوځول.
د افغانستان د پیل لوبغاړو ګربز او ابراهیم ځدراڼ ډېره ښه لوبه پیل کړه او تر سلو زیاتو منډو ملګرتیا یې وکړه، ګربز تر ۶۶ تیزو منډو وسوځېد، خو ابراهیم ځدراڼه محتاطه لوبه کوله، خو په ۸۷ منډو هغه هم خپله وېکټه له لاسه ورکړه.
ورپسې لوبډلمشر حشمت الله شهیدي او رحمت شاه زرمتي له مسوولیته ډکه لوبه وکړه او تر اخره پاتې شول او خپلې لوبډلې ته یې بریا ورپه برخه کړه.
رحمت شاه ۷۷ او حشمت ۴۸ ناسوځېدلې منډې وکړې. افغانستان تر دې مخکې د نړېوال جام دفاعي اتل انګلستان ته هم ماتې ورکړې وه.
افغانستان تر دې مخکې په شل اووریزو نړېوالو لوبو کې پاکستان ته ماتې ورکړې وه، خو په یوه ورځنیو نړېوالو لوبو کې یې دا ځل لومړۍ بریا ترلاسه کړه.
افغانستان تر دې مهاله د نړېوال جام سیالیو په لړ کې پنځه لوبې کړې چې دوه یې ګټلې او درې نورې یې بایللې دي او د روانو لوبو په جدول کې شپږم ځای لري، خو پاکستان دوو ګټلو او دوو بایللو وروسته په پنځم مقام کې دی.
هندوستان لومړی، نیوزیلینډ دویم، سویلي افریقا درېیم، اسټرالیا څلورم، بنګله دېش اووم، نیدرلینډ اتم، سریلانکا نهم او انګلستان په لسم مقام کې دی.
Views: 43
