د بهرنيو چارو وزارت وايي، چې د ټولو نړېوالو قوانينو او تعهداتو پر خلاف، پاکستان په کراچۍ بندر کې افغان سوداګرو ته ستونزې جوړوي او کرنیزو حاصلاتو او مېوو رسېدو پرمهال په بېلا بېلو بهانو دروازې تړي.
دغه وزارت زیاته کړې، د پاکستاني لوري له خوا د تورخم دروازې تړل او پر افغان امنیتي ځواکونو ډزې د ښه ګاونډیتوب خلاف اقدامات دي.
د بهرنیو چارو وزارت د وږي په ۱۸مه د شپې ناوخته په يوه خبرپاڼه کې ویلي، د تورخم دروازه وروسته له هغې د پاکستان حکومت وتړله چې د تېرې چهارشنبې په ورځ د پاکستاني ځواکونو له خوا پر افغان سرحدي ځواکونو پر داسې مهال ډزې وشوې چې افغان ځواکونه د یوې پخوانۍ امنیتي پوستې چي کلونه وړاندې جوړه شوې وه، پر ترميم بوخت وو.
سرچینې زیاته کړې، د تورخم لارې تړل د دواړو هیوادونو او سیمې سوداګري اغېزمنوي او د دواړو غاړو عام سوداګر له تجارتي او مالي زیان سره مخ کولای شي.
په خبرپاڼه کې راغلي: «متأسفانه د ټولو پخوانیو ژمنو، حاکم عرف او د نړېوالو قوانينو په چوکاټ کې د تعهداتو پر خلاف، پاکستانی لوری ډېری وخت د کراچۍ بندر کې مشکلات رامنځ ته کوي او د افغان کرنیزو حاصلاتو او مېوو د رسېدو پرمهال په نه توجیه کېدونکو پلمو دروازې تړي چې نه یوازې د افغانستان او پاکستان تجارت زیانمنوي، بلکې د وروڼو ولسونو او هېوادونو تر منځ فاصلې زیاتوي. او د ټولې سیمې تجارت او ټرانزیټ له خنډ او ځنډ سره مخ کوي.»
د بهرنيو چارو وزارت په دغه خبرپاڼه کې د ستونزې د حل لپاره د تفاهم او ديپلوماتيکو خبرو اترو باندې ټينګار کړی او د سوداګرۍ پر وړاندې دا ډول اقدامات يې نه يوازې د افغانستان بلکې د سيمې او په خپله د پاکستان د اقتصاد لپاره هم زيانمنه چاره بللې ده.
د اطلاعاتو او کلتور لوی مديريت مسوولينو د وږي په ۱۸مه په تورخم کې وويل چې لا هم د څلورمې ورځې لپاره دروازه د پاکستان لخوا د ټرانسپورټ او ټرانزيت (مسافرو او سوداګرۍ) پر وړاندې تړلې ده.
د دې لارې تړل کېدو له امله دواړو خواوو ته سلګونه لارۍ او خلک بند پاتې دي او د دروازې خلاصېدو غوښتنه کوي.
دا په داسې حال کې ده چې تېره ورځ د افغانستان لپاره د پاکستان ځانګړي استازي اصف دراني ويلي، دوی هم درک کوي چې د دروازې له تړلو سره دواړو غاړو ته عام خلک متضرره کېږي.
نوموړي زیاته کړې چې له خپلو اړوند اداراو يې د تورخم دروازې د ژر خلاصون غوښتنه کړې ده.
بلخوا د تورخم دروازې تړل کېدو د تازه مېوو سوداګر له ستر مالي زیان مخ شوي دي.
که څه هم د ننګرهار د سوداګرۍ خونې مسوولین وايي چې د تازه مېوو او سبزيجاتو د لېږد مسير له تورخمه د خوست غلام خان دروازې ته تغيیر شوی خو په جلالاباد ښار کې د ګڼو هغو لاريو مېوې په کمه بيه ليلامېږي چې له نورو ولايتو پاکستان ته د وړلو په موخه ننګرهار ته رسېدلې دي.
د ننګرهار د سوداګرۍ او پانګونې خونې د صادراتو مسوول شکرالله ساپي وويل چې د تورخم دروازې تړل کېدو له امله سوداګرو ته ميليونونه افغانۍ زيان اوښتی او لا هم دغه لړۍ روانه ده.
هغه وويل: «د جګړې له امله چې د تورخم دروازه تړل شوې، دواړو خواوو ته دقیق ارقام نه دي معلوم خو د يونيم زر په شاوخوا کې لارۍ ولاړې دي.»
د ساپي د معلوماتو له مخې، که څه هم ځينې لارۍ تر ننګرهاره رسېدلې خو د نورو لاريو مسير چې له مختلفو ولایتونو يې پاکستان ته تازه مېوه او سبزي لېږدوله، د خوست غلام خان ته تغيیر شوی او د مېوو خرابېدو او د سوداګرو د زيان مخه نيول شوې ده.
د جلالاباد ښار کې ګڼې لارۍ ليدل کېږي چې تازه مېوه او سبزي يې پاکستان ته د وړو په نيت بار کړي خو اوس د لارې تړل کېدو له امله يې په کمه بيه پلوري.
د جلالاباد ښار د مېوې مارکېټ يوه دوکاندار غلامجان پژواک ته وويل چې له تېرو درېيو ورځو راهیسې ګڼې لارۍ دغه مارکېټ ته ورځي او مېوې يې د خرابوالي په وجه په کمه بيه خرڅوي.
دی وايي چې حکومت بايد دغو موټرو ته د تګ زمينه برابره کړي.
Views: 611
