د خیبر پښتونخوا ایالت په بنو سیمه کې د یوه ځانمرګي له امله نهه پاکستاني سرتیري وژل شوي دي.
پاکستانیو رسنیو خبر ورکړی چې دا برید د پنجشنبې په ورځ تر غرمې وروسته د بنو په جاني خېلو سیمه کې د پوځ پر یوه کاروان شوی و.
د پاکستان د پوځ له خوا په یوه خپره شوې خبرپاڼه کې راغلی چې د موټرسایکل په وسیله ترسره شوي ځانمرګي برید کې نهه سرتیري وژل شوي او پنځه نور ژوبل شوي دي.
سرچینې زیاته کړې چې تر یاد بریده وروسته یې په سیمه کې چاڼیز عملیات پیل کړي دي.
د یادونې وړ ده چې په دې وروستیو کې د پاکستان پر امنیتي ځواکونو بریدونه زیات شوي دي چې د ډیرو مسوولیت د تحریک طالبان پاکستان ډلې ټي ټي پي اخیستی دی.
Views: 31
