د نړېوالو سرچینو د معلوماتو له مخې، د روسیې د ولسمشر پوټین پر خلاف د ناکامه کودتا مشر د واګنر ځواکونو قوماندان یوګیني پریګوژین مسکود ته نږدې په غورځېدلې الوتکه کې مړ شوی دی.
روسي چارواکو ویلي، هغه الوتکه چې پریګوژین پکې سپور و، د چهارشنبې په ورځ (د وږي په لومړۍ نېټه) د مسکو په سل کیلو مترۍ کې ولوېده او په کې سپاره ټول ۱۰ کسان مړه شول.
د روسیې د هوایي چلند ادارې ویلي: “هغه الوتکه چې په تویر سیمه کې لوېدلې ده، د مسافرینو په منځ کې یوګیني پریګوژین هم شامل و.”
بلخوا د روسیې ټاس خبري اژانس خبر ورکړی چې په الوتکه کې درې پیلوټان او اوه مسافر سپاره وو. روسي مقاماتو ویلي دي چې د الوتکې د نسکورېدو د لاملونو په اړه څیړنې روانې دي.
د رسنیو ناتائید شویو خبرونو کې ویل شوي چې دغه الوتکه د پریګوژین ځواکونو پورې مربوطه وه.
د واګنر ملېشو ډله په اوکراین کې د روسیې د پوځي یرغل په سر کې ځای درلود او ډېری سیمې به لومړی همدغې ډلې نیولې او بیا به یې د روسیې پوځ ته سپارلې.
د روان زیږدیز کال د جون په ۲۴ په اوکراین کې د روسیې په ملاتړ د جنګیدونکو ملیشو مشر پریګوژین د مسکو په خلاف وسله وال بغاوت وکړ، خو وروسته یې خپلو سرتیرو ته د شاتګ امر وکړ.
د روسیې ولسمشر ولادیمیر پوتین د جون په ۲۶ ملت ته د وینا پر مهال د مسکو پر ضد د واګنر ګروپ د وسله والو بغاوت منتظمین “غداران” وبلل او تور یې پرې ولګاوه چې خپل ولس ته یې درواغ ویلي.
پوتین زیاته کړې وه، چې د “بغاوت مشرانو خپل غړي مرګ خوا ته ورټیل وهل او دیته مجبورول چې خپل خلک ووژني”.
د واګنر ملیشو له وسله وال پاڅون وروسته، د روسیې دفاع وزارت اعلان وکړ چې د واګنر هغه ملیشې چې په یاد پاڅون کې یې برخه نه وه اخیستې، پوځ سره به یوځای شي او د دفاع وزارت سره به یو تړون لاسلیک کړي.
خو پریګوژین دې مسلې ته په اشارې سره ویلي وو، چې د هغه ځینې ملیشې له نورو جوړښتونو سره یوځای شوي، خو بیرته واګنر ګروپ ته د ستنیدو په لټه کې دي.
د واګنر ګروپ مشر ویلي وو، د دې دپاره یې د بې عدالتۍ پر ضد لاریون کاوه چې د روسیې پوځ د اوکراین په ختیځ کې د دوی مرکزونه په توغندیو ویشتل او روسي چورلکو هم پرې بمبارد کړی. روسیې د هغه دا تورونه رد کړي دي.
په روسیه کې د واګنر ګروپ له پاڅون راهیسې، د دغه ډلې ځینې جنګیالي د روسیې پوځي متحد، بیلاروس ته تللي او د هغه هیواد پوځیانو ته روزنه ورکوي.
د حالاتو څارونکو د واګنر ډلې د پوتین د حاکمیت لپاره تر ټولو لوی خطر ګڼلی و. د دوی په باور په روسیې کې د پرېګوژین شتون د دې څرګندوی کوي چې د هغه خطر لا په خپل حال دی او مسکو د دغې ډلې د جنګیالیو په اړه د پرېکړې تر وخت پورې له هغه سره له احتیاط نه کار اخلي.
د پريګوژین د سپرلۍ الوتکه په داسې حال کې غورځېدلې، چې په همدې ورځ د روسیې یو لوړپوړی جنرال سیرګي سوروفکین د هوايي ځواک له مشرۍ ګوښه کړل شوی دی.
ویل کېږي، جنرال سوروفکین له پريګوژین سره تاوده اړیکي درلودل او د جون میاشتې له بغاوت وروسته په عام محضر کې نه دی لیدل شوی.
غورځېدلې الوتکه له اووه سپرلیو او د عملې دریو کسانو سره له پلازمېنې مسکو نه د روسیې سنټ پېټرزبرګ ته پر لار وه چې د پېښې ښکار شوه.
ویل کېږي الوتکه د مسکو او سنټ پېټرزبرګ تر منځ د لارې په نیمايي کې کوژینکینو تویر کلي ته نژدې غورځېدلې ده.
د یادونې وړ ده چې پریګوژین په ۲۰۱۴ کال واګنر ملېشه جوړه کړه، چې اوس ۲۵ زره وسله وال لري. دا ملېشه په اوکرایین، سوریه او لوېدیځه افریقا کې فعاله وه او د زور او ظلم کیسې یې مشهورې شوې.
Views: 27
