د پاملرنې موسسه وایي، دمګړۍ ۲،۵ میلیون افغان نجونې له زدهکړو پاتې دي، خو د پوهنې وزارت بیا وایي چې له شپږم ټولګي پورته د ۱،۳ میلیون نجونو زدهکړې ځنډول شوې دي.
پاملرنې (care) موسسې «په افغانستان کې د لویو ستونزو سره سره ځينې نجونې لا هم د زدهکړې لپاره لارې مومي» تر عنوان لاندې یوه راپور کې ویلي، په افغانستان کې زدهکړو ته لاسرسی د ماشومانو لپاره یوه لویه ستونزه ده.
دغه راپور کې راغلي چې اوسمهال، ۸۰ سلنه (۲،۵ میلیونه) افغان نجونې له تعلیم او لوړو زدهکړو پاتې دي او په ټوله نړۍ کې افغانستان یوازېنی هېواد دی چې په کې نجونې او ښځې له زدهکړو منع شوې دي.
د پاملرنې موسسې د معلوماتو له مخې، په افغانستان د اسلامي امارت د بیا واکمنېدو وروسته شاوخوا ۱،۱ میلیون نجونې له تعلیم څخه او له سل زرو ډېرې نجونې له لوړو زدهکړو محرومې وې خو اوس دغه شمېره ۲،۵ میلیونو ته لوړه شوې ده.
دغه بنسټ له جزییاتو ورکولو پرته ویلي، له زدهکړو د نجونو محرومیت د افغانستان اقتصاد ته ۵،۴ میلیارده ډالر زیان اړولی دی.
دغه راپور کې هغو نجونو ته چې له تېر کال راهیسې د دغه بنست له خوا پر زدهکړو بوختې دي اشاره شوې؛ په ټوله کې د ۶۴ معلولو نجونو په ګډون ۱۴۵۱ له زدهکړو محرومې نجونې د دغه بنسټ له خوا په ابتدایي کچه پر زدهکړو بوختې دي او د ۵۷ ښوونکو له خوا ورته تدریس کېږي.
خو دوه ورځې مخکې د پوهنې وزارت سلاکار او د دفتر رییس عزیزاحمد ریان یوه ناسته کې ویلي و چې له شپږم ټولګي پورته د ۱،۳ میلیون نجونو زدهکړې ځنډول شوې دي.
دا په داسې حال کې ده چې دوه کاله مخکې د طالبانو له خوا له شپږم ټولګې پورته د نجونو زدهکړې او د تېر کال د لېندۍ میاشتې په ۲۷مه د نجونو لوړې زدهکړې ځنډول شوې دي.
Views: 22
