د امریکا سپینه ماڼۍ وايي، داسې شواهد نشته چې وښيي په پاکستان کې او د ډیورنډ کرښې په اوږدو کې مېشت افغان کډوال دې په سخت دریځۍ او ترهګرۍ فعالیتونو کې دخیل وي.
د سپينې ماڼۍ د ملي امنیت د شورا ویاند جان کربي ویلي: «موږ داسې کومه نښه نه وینو چې افغان کډوال دې په پاکستان او یا د سرحد په اوږدو کې په ترهګرۍ فعالیتونو کې ګرم وي.»
دغه راز جان کربي تېره ورځ په خپلو خبرو کې له پاکستانه مننه وکړه، هغو افغانانو ته یې چې د خوندي ځای په لټه کې دي «په سخاوتمندانه ډول» ځای ورکړی دی.
خو دا یې هم وویل: «د ترهګرۍ ګواښونو په اړه به موږ له پاکستان سره ګډ کار کول روان ساتو.»
دا په داسې حال کې ده چې د پاکستان پوځ او د دغه هېواد دفاع وزیر خواجه اصف ادعا کوي، ترهګر په افغانستان کې خوندي ځایونه لري.
په دې وروستیو کې د بلوچستان په ایالت کې- چې له افغانستان او ایران سره سرحدونه لري- د پاکستان په امنیتي ځواکونو بریدونه شوي او یو شمېر یې وژل شوي او ژوبل شوي دي. د ډېرو بریدونو مسوولیت بلوڅ بیلتون غوښتونکي مني.
په افغانستان کې د سرپرست حکومت له جوړېدو سره پاکستان په وار وار دا خبره کړې ده چې پاکستاني طالبان په افغانستان کې خوندي ځایونه لري او له هغه ځایه په پاکستان کې بریدونه تنظیموي.
خو د افغانستان سرپرست حکومت دا خبره ردوي او ټینګار کوي، هیچا ته به اجازه ورنه کړي چې د افغانستان له خاورې د نورو پر ضد کار واخلي.
د طالبانو ویاند ذبیحالله مجاهد د پاکستان پوځ د مشر جنرال عاصم منیر څرګندونو په اړه ته وویل، افغانستان په خپله د جنګ قرباني و، له جګړې ډېرې بدې خاطرې لري او هیڅکله نه غواړي چې د بل هېواد پر وړاندې جګړه جوړه شي.
هغه وویل: «د پاکستان په شمول د نورو هېوادونه په کورنیو مسایلو کې چې کومه پېښه کېږي او یا په داخل کې ناامني رامنځته کیږي باید له امله یې د پړې ګوته افغانستان ته ونه نیول شي، خپله دې خپلې ستونزې په داخل کې حل کړي او پر هغو باید تمرکز وشي؛ اسلامي امارت ډاډ ورکړی چې د افغانستان خاوره د هیچا پر وړاندې استفاده کېدو ته نه پرېږدي، پر دې خبره موږ ټینګ ولاړ یو، د پاکستان په ګډون د هیڅ بل هېواد پر وړاندې تحرکاتو ته اجازه نه ورکوو چې له افغانستانه وشي او یا د افغانستان خاوره استعمال شي، اسلامي امارت په دې برخه کې خپله ټوله انرژي مصرفوي.»
Views: 29
