د فیسبوک شرکت ‘مېټا’ له ټویټر سره د سیالۍ لپاره د ‘ټریډز’ په نامه نوی اپلېکېشن جوړ او ټاکل شوې چې سبا د پنجشنبې په ورځ پر فعالیت پیل وکړي.
د مېټا کمپنۍ اعلان کړی چې دغه نوی اپ به له اېنسټګرام سره د تړل کېدو له لارې فعالیت کوي.
دغې کمپنۍ زیاته کړې، چې ترېډز به د لیکنې مکالمې اپلیکېشن وي. دا به د پنجشنبې په ورځ امریکا او د جمعې په ورځ نورې نړۍ کې په فعالیت پیل وکړی.
دا تر دې دمه د فېسبوک او د ټوېتر د څښتنانو مارک زوکربرګ او اېلون مسک ترمنځ سیالۍ کې وروستی ګام دی.
دوی دواړو تېره میاشت وویل چې د کږې غېږي سیالي به هم سره کوي، خو لا روښانه نه ده چې په دې تړاو رښتیا څومره جدي دي.
بلخوا د ټویټر مالک ایلان مسک په یوه پیغام کې د ترېډز فعالېدو ته غبرګون ښودلی.
هغه لیکلي “شکر دی چې دوی عاقلانه مخ ته ځي.”
په ورته وخت ټویټر ویلي چې د دې خواله رسنۍ مشهور ډشبورډ ‘ټویټډېک’ به په ۳۰ ورځو کې د تادیې چوکاټ ته ولوېږي.
اېلون مسک غواړي چې د ټویټر کاروونکي د ګډون خدمتونو کې غړیتوب ته وهڅوي او دا وروستی ګام هم د همدې لړۍ او هڅو برخه ده.
هغه تېره شنبه د ټویټر کارنو لپاره د پیغامو د کتلو ورځنی شمېر هم محدود کړ.
خو د مېټا د ټرېډز له اپلیکېشنه داسې ښکاري چې خدمتونه به یې وړیا وي او کاروونکو ته یې د پوست یا پیغامونو د کتلو ورځنی محدودیت هم نشته.
په اپ سټور کې د دغه اپلیکېشن په توضحیاتو کې لیکل شوي، ترېډز هغه ځای دی چې ټولنې په کې د هرې هغې موضوع په تړاو بحث لپاره راټولېږي، چې نن یې په اړه فکر کوي او سبا یې ټرېنډ کوي.
وروستیو کلونو کې ګڼ داسې اپلیکېشنونه راوتلي چې ټویټر ته ډېر ورته دي.
په دوی کې د امریکا د مخکیني ولسمشر ډونلډ ټرمپ ‘ټروت سوشیل’ او مسټودون هم شامل دي.
بل ورته اپلیکېشن ‘بلو سکی’ دی، چې ادعا کوي د ټویټر پر کارنو د مسک د روانې اوونۍ له محدودیتونو وروسته پرې ګڼه ګوڼه د ریکارډ تر کچې لوړه شوې ده.
خو ترېډز به ښايي په دې منځ کې د ټویټر تر ټولو پیاوړی سیال شي، ځکه خاوند یې مارک زوکربرک د خواله رسنیو بازار کې د فعالیت اوږده مخینه او دې سیالۍ لپاره کافي سرچېنې لري.
د مېټا ریلز ته تر ډېره د ټیکټاک د کاپي په سترګه کتل کېږي، او سټوریز یې بیا سنپچټ ته ډېره ورته ده.
د دې کمپنۍ خاوند ښايي دې ته هم سترګې پر لاره وي چې له ټویټره لېرې کېدونکي کسان به د دوی نوي اپلېکېشن ته مخه کړي.
