د پښتونخوا ملي عموامي ګوند (میپ) مشر خوشحال کاکړ وایي چې پلار یې عثمان کاکړ غوښتل، پر پښتون افغان د شویو ظلمونو ازاده پلټنه وشي.
نوموړي دا څرکندونې د غبرګولي په ۳مه، په هغه ټویټر سپیس کې وکړې چې د پښتون کونسل کاناډا لخوا د وتلي پښتون سیاستوال عثمان کاکړ د دویم تلین په مناسبت جوړ شوی و.
په دې سپیس کې د لسګونو ګډونوالو ترڅنګ د لر او بر پښتنو سیاستوالو، لیکوالو، څېړونکو او ژورنالستانو برخه اخیستې وه.
په دې کسانو کې ډاکتر سید عالم محسود، پروفیسر عالم خان، عبدالغفور لېوال، مشال خان کاکړ، وړانګه لوڼی، نصر الله زهري، سردار حسین بابک، اېمل خټک او یو شمېر نور شامل وو.
د دې ټویټر سپیس وینا والو د عثمان خان کاکړ پر ژوند، سیاست او مبارزې باندې هر اړخیزې خبرې وکړې او د هغه د سیاسي مبارزې پر روانه ساتلو ټینګار وکړ.
د کوزې پښتونخوا وتلي سیاستوال افراسیاب خټک وویل چې عثمان کاکړ د نوي نسل رهبر و، د هغه له سیاست څخه ځوانانو ته یوه رڼا ښکارېده.
هغه زیاته کړه، چې پښتنو او بلوڅانو دعثمان کاکړ ملاتړ کولو او ده هم د دواړو د حقونو لپاره مبارزه کوله.
دی وایي چې په دې حساسو شرایطو کې اوس د عثمان کاکړ په څېر یو رهبر ته سخته اړتیا ده.
د عوامي نیشنل ګوند مرکزي غړي سردار حسین بابک وویل چې عثمان کاکړ هره خبره په نره او په زغرده کوله او هېڅکله د مصلحت ښکار شوی نه و.
هغه وویل چې نوموړی یو زړور رهبر او د ځوانانو په مینځ کې یې ډېر مینه وال درلودل.
په واشنګټن کې مېشت پښتون ژورنالیست رحمان بونیري وویل چې عثمان کاکړ د پښتون افغان قام له ستونزو، روایاتو او فرهنګ څخه باخبره رهبر و او دده خبرو کې یو څرګند پیغام پروت و.
دی وایي چې د هغه په خبرو کې پښتون افغان ملت ته یو څرګند پیغام پروت و، د خپل ملت په غم غمژن او په ښادیو خوشحاله کېده.
د پښتون ژغورنې غورځنګ مرکزي مشره وړانګې لوڼۍ وویل چې عثمان کاکړ د افغان وطن غمخوار و، او دې ورسره په څنګ کې مبارزه کوله.
دې زیاته کړې : “ عثمان کاکړ به تل ویل چې موږ په شته من وطن کې د غلامۍ ژوند کوو، خو ددې غلامۍ څخه د خلاصون لپاره باید پراخه مبارزه وشي. “
لیکوال او شاعر عبدالغفور لېوال وویل چې د عثمان کاکړ د هغه ملي ایجنډا پراخه وه، افغاني خاوره په کې شامله وه، هغه وړوکی فکر نه کولو بلکې هغه پراخه فکر درلود.
د هغه به وینا، عثمان کاکړ د ټول پښتون افغان لپاره مبارزه کوله او د پښتون ملي ایجنډا باندې یې ټینګار کاوه.
لېوال وویل، د دې ترڅنګ چې هغه ملي سیاست کې ډېره تجربه لرله، په نړېوال سیاست کې یې هم پراخه تجربه او معلومات درلودل. او دا معلومات یې له خپل ولس سره شریکول او له هېچا نه ډاریدل.
ده زیاته کړه، عثمان کاکړ د هغو دسیسو څخه پرده پورته کړې چې د افغان پښتون پر ضد روانه وه، یواځې پرده یې نه ده پورته کړې بلکې پر وړاندې یې دریدلی او مبارزه کړې ده. همدا جراات او سپینه وینا د ده د مرګ لامل شو.
د عثمان کاکړ زوې، سیاسي ځای ناستی او د پښتونخوا میپ ګوند مشرخوشحال خان خټک د پښتون کونسل کاناډا څخه مننه وکړه چې د عثمان کاکړ دویم تلین نمانځلو لپاره یې دا پروګرام جوړ کړ.
ده زیاته کړه: “عثمان کاکړ ملي شهید او افغان شهید دی، بلکې هغه د محکومونو قومونو شهید و، پر افغان او او افغانیت ميین او تل یې د پښتون افغان بلکې د ټولو محکومونو قومونو لپاره یې مبارزه کوله. “
خوشال خان کاکړ وویل، له تیرو ۲۰۰ او ۳۰۰ کلونو راهیسې پر افغان پښتون قوم ظلمونه کېږي او د نړېوالو دسیسو لاندې دي، خو عثمان کاکړ غوښتل چې پر پښتون افغان قام چې له سلګونو کلونو راهیسې ظلمونه کېږی، د دې باید بې پرې او پراخه څېړنې او پلټنې وشي.
د هغه په وینا، عثمان کاکړ پر دې کار کولو چې پر پښتون افغان قام د ظلمونو لاملونه دې په ډاګه شي او معلومه شي چې ولې دا ظلمونه شوي دي.
Views: 7
