د ننګرهار پوهنتون کمپيوټرساينس پوهنځي يوه محصل داسې څیرکې عينکې او لکڼه جوړ کړي چې له نابينايانو سره په ګرځېدو او د ژوند نورو چارو پر مخ بيولو کې مرسته کوي.
بشيراحمد عمرخېل چې اصلاً د ميدانوردګو ولايت د نرخ ولسوالۍ د عمرخېلو سيمې اوسېدونکی دی او اوس د ننګرهار پوهنتنون د کمپيوټرساينس پوهنځي محصل دی، وايي، که امکانات ورته برابر شي پر ټکنالوجي سمبالۍ داسې نورې اختراعګانې به هم وکړي.
عمرخېل وويل، لومړنۍ زدهکړې يې په نرخ ولسوالۍ کې د ډاکټر عبدالوکيل په عالي لېسه کې کړې او له هماغه وخته يې هيله درلوده چې کمپيوټرساينس پوهنځی ولولي.
هغه شاوخوا څلور کاله مخکې خپلې دغې هيلې ته رسېدلی او د ننګرهار پوهنتون کمپوټرساينس پوهنځي ته بریالی شوی چې اوس په همدغه پوهنځي کې د څلورم ټولګي زدهکړيال دی.
نوموړی وايي: «له ما سره له ډېر وخته دغه فکر موجود و، بيا مې د پوهنځي له ادارې او استادانو سره دا طرحه شريکه کړه، هغوی هم تشويق کړم او هم يې د همکارۍ ډاډ راکړ، ډېر لاسنيوی او مرسته راسره د پوهنځي قدرمن رييس او يوه استاد رياض حسين کړې ده< زه ورڅخه ډېره مننه کوم.»
عمرخېل زياتوي، د ادارې له خوا ورته موجود ټول امکانات په واک کې ورکړل شوي وو او توانېدلی چې د يوې نيمې مياشتې په موده کې دغه عينکې او امساء جوړ کړي.
هغه وويل: «کله چې مې له استادانو مشوره واخیسته، نو کار مې پرې شروع کړ، د يوې نيمې مياشتې په موده کې مې دغه عينکې او امساء جوړ کړل، بيا مې ادارې ته راوړل، استادانو او محصلينو ته مې نندارې ته وړاندې کړل چې ټولو خوښ کړل او هم يې زما ډېره ستاینه وکړه.»
نوموړي په یاده امساء او عينکو شاوخوا ۳۰۰۰ افغانۍ لګښت کړی خو کولی شي چې په راتلونکي کې دغه لګښت راکم کړي.
عمرخېل زياتوي، دغه امساء او عينکې کولی شي يوه نابينا ته معلومات ورکړي چې مخامخ ورته دېوال يا بله موانع ده او يا هم په ځمکه اوبه یا نور ګواښ دی، څو هغه خپل مسير بدل کړي او له ستونزې سره مخ نه شي.
بل لور ته د نوموړي ټولګيوال وايي، هيڅ باور يې نه کاوه چې بشيراحمد به داسې يوه اختراع وکړي خو وايي، کله چې يې وليدل نو ډېر حيران شول.
زبير ستانکزی چې د بشيراحمد ملګری او ټولګيوال دی وايي: «د نوموړي دغه حيرانوونکی کار زه هم هڅولی یم چې له خپلو زدهکړو په استفاده دې ته ورته يو څه جوړ کړم.»
چارواکي وايي، په دغه ولايت کې د ټولو هغو ځوانانو ملاتړ او هڅونه کوي چې دا ډول وړتياوې ولري.
د ننګرهار د اطلاعاتو او کلتور رييس قاري نورمحمد حنيف وايي، هڅه کوي څو دا ځوان هغو ادارو ته چې د ټکنالوجۍ برخه کې کار کوي، ور وپېژني چې په راتلونکي کې يې له وړتياوو ګټه واخيستل شي.
له دې مخکې په ځينو نورو ولايتونو کې هم ځوانانو د موټرو او نورو تخنيکي الو په جوړولو سره خپلې وړتياوې نړۍ ته ښودلې دي.
Views: 17
