ننګرهار کې توپان او اورښت ۳۵ کسان مړه او ۲۳۰ نور ټپیان کړي دي

چارواکي وايي، ننګرهار کې تر اوسه د توپان او اورښت له امله ټپيان شوي ۲۳۰ تنه او ۳۵ مړي روغتونونو ته لېږدول شوي.
نن له غرمې وروسته د دغه ولایت په مرکز او ځینو ولسواليو کې سخت توپان او باران چې په ځينو ځایونو کې ږلۍ هم ورسره وه.
د ننګرهار ولايت د اطلاعلتو او کلتور ریاست د اطلاعاتو امر صدیق الله قریشي وويل، د ننني سخت توپان او اورښت له امله ټپيان شوي ٢٣٠ تنه او۳۵ مړي د جلال اباد حوزوي روغتون او د فاطمه الزهرا ولايتي روغتون ته لېږدول شوي دي.
له یادو کسانو نهه تنه د یوې کورنۍ غړي دي.
قریشي وايي، د سره رود ولسوالۍ اړوند مستي خېل سيمه کې په يوه کور کې د خونې چت پرېوتو له امله د ښځو او ماشومانو په ګډون پنځه کسان مړه او څلور ټپيان شوي دي.
د هغه په وينا، د جلال آباد ښار، بټي کوټ ولسوالۍ او يو شمېر نورو سيمو کې د کرنې او کانال رياستونو او ولس ګڼ شمېر ونې غورځيدلي او فصلونه یې تخريب شوي دي.
دی وايي چې جلال اباد ښار او ځینو ولسواليو کې يو شمېر کورونه هم تخريب شوي دي.
د ننګرهار د عامې روغتيا ریاست ویاند نقیب الله رحیمي وايي چې د جلال اباد حوزوي روغتون کې ټپیان تر درملنې لاندې دي او لا هم له مختلفو سیمو څخه ځیې ټپیان دغه روغتون ته وروړل کېږي.
هغه وویل چې د مرګ ژوبلې کره شمېرې به وروسته له رسنیو سره شریکې کړي.
په ښار او ځینو سيمو کې د برښنا او مخابراتي شبکو ستنې هم د توپان او اورښت له امله غورځيدلي او له امله یې برېښنا او مخابراتي خدمتونه هم پرې شوي دي.

Views: 16