د بښنې نړۍوال سازمان په داسې حال کې له پاکستانه د افغان کډوالو د ایستلو بهیر د ژر تر ژره درولو غوښتنه کړې چې د ملګرو ملتونو سرمنشي هم ویلي، نړۍ باید له کډوالو د هرکلي ترڅنګ د هغوی له انساني حقونو دفاع وکړي.
د جون ۲۰مه د ګډوالو له نړۍوالې ورځې سره برابره ده.
د بښنې نړۍوال سازمان پرون (پنجشنبه) د کډوالو د نړۍوالې ورځې په مناسبت پر اېکسپاڼه لیکلي، افغان کډوال په پاکستان کې د ۲۰۲۳ کال له اکتوبر راهیسې په ناوړه شرایطو کې ژوند کوي.
دغه سازمان زیاته کړې چې د پاکستان دغه پرېکړه د افغان کډوالو د ځورولو، نیولو او ترمنځ یې د احتمالي بېرته ستنولو د وېرې لامل شوې ده.
د راپورونو له مخې، د ۲۰۲۳ کال له اکتوبر راهیسې څه باندې ۵۰۰ زره افغان کډوال له پاکستانه په زور ایستل شوي او دا لړۍ لا هم روانه ده.
د پاکستان حکومت د روان میلادي کال په اپرېل کې د دغه هېواد پولیسو ته سپارښتنه وکړه څو د افغان کډوالو د ایستلو دویم پړاو پیل کړي.
په همدې حال کې، د ملګرو ملتونو سرمنشي انتونیو ګوترېش پرون (پنجشنبه) پر اېکسپاڼه لیکلي، نړۍ باید له کډوالو د هرکلي ترڅنګ د هغوی له انساني حقونو دفاع وکړي.
هغه زیاته کړې: «د کډولۍ په نړۍواله ورځ، راځئ د نړۍ ټولیز مسوولیت د کډوالو د هرکلي او د هغو د انساني حقونو په دفاع او په ټوله کې د هغو کسانو د شخړو پر حل او فصل ټینګار وکړو چې د خپلو ټولنو پرېښودو ته اړ شوي وي، څو وکولای شي بېرته خپلو کورونو ته ستانه شي.»
دا په داسې حال کې ده چې د تېرې اونۍ پنجشنبې په ورځ د کډوالو په چارو کې د ملګرو ملتونو عالي کمېشنرۍ اعلان وکړ چې د روان کال تر اپرېل میاشتۍ په نړۍ چې ۱۲۰ میلیون کسان بېځایه شوي چې اصلي لامل یې نظامي جګړې دي.
د سرچینې په وینا، په نړۍ کې ډېری خلک د جګړو، تاوتریخوالي او ځورولو له امله د خپلو سیمو پرېښودو ته اړ شوي، چې شمېر یې له دې مخکې هیڅ کله دې کچې ته نه و رسېدلی.
Views: 15
