محمد نصیر اماني -چې کورنۍ یې په افغانستان کې د اوږدې جګړې او د ټولنې ناوړه دودونو له امله له کورني تاوتریخوالي سره مخ شوې- په ماشومتوب کې یې په پاکستان او ایران کې د کډوالۍ درانه کارونه ترسره کړي دي، پر قاچاقي لارو له افغانستانه لومړی ایران بیا ترکیې، له هغه ځایه یونان، ایټالیا او بیا په ډېرو کړاوونو جرمني ته ولاړ او له شاوخوا ۱۴ کلونو راهېسې په جرمني کې ژوند کوي.
اماني چې د ټولنیزو علومو برخه کې زدهکړې کړې او په جرمني کې یې په بېلابېلو ادارو کې دندې ترسره کړې، له څو کلونو راهیسې یې پر ټولنیزو پاڼو د ځینو ملي او ټولنیزو مسایلو په اړه د افغانانو د ویښتابه لپاره مدني فعالیتونه پيل کړي دي. نوموړی اوس د ښځو د حقونو او د افغانانو د ویښتابه برخه کې پر مبارزې بوخت دی.
د جګړې دغه قرباني یتیم محمدنصیر اماني چې اوس د ښځو د حقونو او د افغانانو د ویښتیابه برخه کې مبارزه کوي، له خپل پلار محمدیاسین سره یو ځای پاسنی انځور هغه وخت کابل کې اخیستی، کله چې پلار یې کابل کې نظامي دنده درلودله.
د محمدنصیر د هویت دغه تذکره په ۱۳۶۷ لمریز کال کې -هغه وخت چې ماشوم و- د کابل ښار له پنځمې امنیتي حوزې اخیستل شوې ده؛ محمدنصیر د محمدیاسین زوی او د دینمحمد لمسی دی او د میدان وردګو ولایت د سیداباد ولسوالۍ د لړم تکیه کلي اصلي اوسېدونکی دی.
د محمدنصیر د پلار محمد یاسین دغه هویت پاڼه ښيي چې هغه په نظامي برخه کې دنده درلوده، په ۱۳۶۰ کال کې د دویم بریدمن، په ۱۳۶۳ کال کې لومړي بریدمن او په ۱۳۶۶ لمریز کال کې یې د تورن رتبه له ملي دفاع وزارت څخه ترلاسه کړې وه او په ۱۳۶۸ کال کې یې په کندهار کې خپل ژوند له لاسه ورکړ.
د محمدنصیر اماني د ماشومتوب انځور؛ دغه انځور هغه وخت اخیستل شوی چې کله د هغه پلار محمد یاسین ژوند له لاسه ورکړی و.
د محمدنصیر د پلار محمدیاسین په نظامي جامو کې انځور چې هغه وخت یې په کابل کې د ملي دفاع وزارت په قطعاتو کې دنده ترسره کوله.
د محمدنصیر د پلار محمدیاسین د ځوانۍ انځور چې د خپل ورور (د اماني د تره) د دویمې کوژدې پر مهال یې اخېستی دی.
د محمدنصیر اماني د مور (ملکه) انځور چې د واده پر مهال اخيستل شوی او اماني وایي چې دا د هماغه وخت انځور دی چې پلار او مور یې تازه واده کړی و.
د محمد نصیر اماني د کورنۍ انځور؛ دغه انځور په کندهار کې هغه وخت اخیستل شوی چې پلار یې محمد یاسین کندهار ته تبدیل شوی، له هغه وروسته د دوی مور کونډه او دوی یتیمان شول.
د محمد نصیر اماني د کورنۍ انځور؛ دغه انځور په ۱۳۸۹ کې وروسته له هغې اخیستل شوی کله چې د اماني پلار خپل ژوند له لاسه ورکړی و .
د کوېټې ښار په امین ښوونځي کې له خپلو ټولګیوالو سره د محمدنصیراماني انځور (اماني د دوو نورو ماشومانو په منځ کې)؛ دا مهال نصیر اماني له خپلې خور او وروره جلا له خپلې مور سره اوسېده، نیمه ورځ به په ښوونځي کې و او نیمه ورځ به یې له پلندر سره خیاطي زده کوله.
د محمدنصیر اماني د ماشومتوب د دورې انځور چې هغه مهال یې په کوېټې ښار کې له یوه خیاط سره مزدوري کوله.
د محمدنصیر اماني د ماشومتوب د دورې انځور؛ دا مهال اماني د کوېټې ګول مسجد ته څېرمه د خیاطۍ دوکان درلوده او په یوازې ځان یې خیاطي کوله.
محمد نصیر اماني په ایران کې د تمرین پر مهال انځور؛ اماني وايي، له دې مخکې به یې سګرټ څکول خو بیا له سپورټ پیلولو او تهران کې له مور سره له یو ځای کېدو وروسته یې سګرټ څکول پرېښودل.
د محمدنصیر اماني د هغه مهال انځور چې د ایران په قزوین کې د کم عمر له کبله کار نشوی پیدا کولی.
د ایران د اصفهان په سبزي میدان کې د جامو ګنډلو پر مهال د محمدنصیر اماني انځور
د ایران په اصفهان ښار کې د محمدنصیر اماني د هغه مهال انځور چې د انګلیسي ژبې زدهکړه یې کوله، د شپې له خوا یې ښوونځی لوست او د ورځې یې خیاطي کوله.
د ایران په اصفهان کې د محمد نصیر اماني او د هغې د مور ملکې انځور؛ دا مهال د اماني مور، خور او ورور یو ځای اوسېدل.
په ۲۰۰۵ زېږدیز کال کې د محمدنصیر اماني د مور (ملکې) د کابل انځور؛ دا مهال له ایران څخه افغانستان تللې وه چې بیا د ناروغۍ له امله مړه شوه.
په ۲۰۱۱ کال کې د محمد نصیر اماني انځور؛ دا مهال اماني په جرمني کې ۱۴ ساعته زدهکړې ترسره کولې.
د محمدنصیر اماني او د هغې د میرمنې نادیې د واده انځور؛ اماني د ۲۰۱۲ کال د جون په ۴مه واده کړی و.
په ۲۰۱۲ کال کې د محمدنصیر اماني د واده د وخت انځور چې په کابل ښار کې له خپلې نیا سره یو ځای اخیستی دی.
د جرمني په مونیخ ښار کې د محمدنصیر اماني د هغه مهال انځور چې د کډوالو ادارې په بایومیتریک برخه کې کار کاوه.
محمد نصیر اماني او د هغه د کورنۍ انځور؛ په انځور کې د هغه میرمن نادیه،۹ کلنه لور ثنا او ۶ کلن زوی میلاد لیدل کېږي.
Views: 22
