د فاریاب ځایي سرچینې وایي چې د دغه ولایت په بلچراغ، چهلګزي او قرغان ولسوالیو کې د تېرې شپې سېلابونو له امله د درنو مالي زیانونو اوښتو ترڅنګ ۴۷ کسان مړه، یو شمېر نور ټپیان او یا لادرکه شوي دي.
د فاریاب د والي ویاند مفتي عصمتالله مرادي وویل چې د تېرې شپې د ورښتونو او ږلۍ له امله بلچراغ، چهلګزي، قیصار، المار، پښتونکوټ ولسوالیو او میمنې ښار کې ویجاړوونکي سېلابونه راووتل چې د دغو سېلابونو په پایله کې د بلچراغ ولسوالۍ په قورچې سیمه کې د ښځو او ماشومانو په ګډون ۴۱ کسان او په چهلګزي ولسوالۍ کې پنځه کسان مړه شوي دي.
نوموړي وویل چې په بلچراغ ولسوالۍ کې پنځه کسان ټپيان او پنځه نور لادرکه شوي او د تلفاتو ډېرېدو احتمال شته دی.
هغه وویل چې لسګونه کورونه، دوکانونه او سلګونه جریب کرنیزه ځمکه، باغونه او مواصلاتي لارې تخریب شوي او ډېر شمېر څاروي تلف شوي دي.
دغهراز، د دغه ولایت د قرغان ولسوالۍ ځایي مسوولینو د تېرې شپې د سېلابونو له امله د یوه کس د مړه کېدو خبر هم ورکړی دی.
د بلچراغ ولسوالۍ د قورچې سیمې یوه اوسېدونکي عبدالخالق وویل چې سېلابونو په دې سیمه کې ناورین رامنځته کړی دی.
ده وویل چې د شپې ۱۲ بجې وې ټول خلک ویده وو چې سېلابونه راغلل او سلګونه کورونه یې لاندې کړل یو شمېر خلک مړه او ټپیان شول او ځيني کسان لا تر اوسه ورک دي.
بلخوا، د میمنې ښاروال داملا ګلاحمد مبشر وایي چې د دغه ښار په بېلابېلو برخو کې د سېلابونو راوتلو له امله خلکو ته درانه مالي زیانونه اوښتي، خو ځاني تلفات نه لري.
Views: 8
