د کډوالو او راستنېدونکو چارو وزارت وايي، په بغلان کې د راغلو سېلابونو له امله ۳۱۵ کسان مړه او ۱۶۳۰ نور ټپیان شوي، دغه راز څه باندې ۲۶۰۰ کورونه په بشپړ او قسمي ډول ویجاړ شوي دي.
د کډوالو او راستنېدونکو چارو وزارت نن سهار (یکشنبه) پر اېکسپاڼه کې لیکلي چې د ولایتي ریاست راپور له مخې: «د بغلان ولایت د مرکزي بغلان ولسوالۍ په شیخجلال کلي او صلح ښارګوټي او د بورکې ولسوالۍ په شرشر کلي کې د سېلابونو له امله ۳۱۵ کسان شهیدان او ۱۶۳۰ نور ټپیان شوي، دوه زره ۶۶۵ کورونه په بشپړ او قسمي ډول ویجاړ شوي او ۱۰۰۰ څاروي له منځه تللي دي.»
سرچينې ليکلي چې یادې شمېرې لومړنۍ دي او د مالي او ځاني زيانونو کچې لوړېدو احتمال هم شته.
خو پېښو ته د رسېدو په چارو کې د دولت وزارت ویاند محمدجانان سايق وويل، د نوو شمېرو راټولوو په حال کې دي چې وروسته به يې له رسنيو سره شريکې کړي.
دا په داسې حال کې ده چې تېره ورځ پېښو د رسېدو په چارو کې د دولت وزارت ويلي وو، له تېرو دوو ورځو راهیسې په تخار، بدخشان، غور او بغلان ولايتونو کې د سېلابونو راوتو له امله ٨٥ کسان مړه او شاوخوا ١٠٠ نور کسان ټپيان شوي دي.
بلخوا، د بغلان د والي وياند ملا علم مجيدي تېره شپه ناوخته ویلي وو چې په دغه ولايت کې د وروستيو سېلابونو له امله ١٣٠ کسان مړه او ١٠٠ نور ټپيان شوي دي.
Views: 8
