د راپورونو له مخې، د حماس په توغندییزو بریدونو کې درې اسرائیلي پوځیان وژل شوي او ۱۱ نور ټپيان دي او د اسرائیلو په بریدونو کې بیا لسو فلسطینیانو ژوند بایللی.
د الجزیرې د خبر له مخې، د فلسطین حماس ډلې تېره ورځ د غزې په سویل کې د رفح له بندر سره نږدې د کرمابوسالم «شالوم کرم» په سرحدي سيمه توغندیيز بريد کړی چې په کې درې اسرائیلي سرتېري وژل شوي او ۱۱ نور یې ټپيان دي.
سرچینه زیاتوي، د حماس ډلې ویلي چې دغه بريد يې د اسرائيلي ځواکونو پر يو پوځي مرکز کړی دی.
په راپور کې راغلي، اسرائیلو هم تېره ورځ پر رفح ښار توغندییز او هوايي بريدونه کړي چې له امله يې لسو فلسطینیانو ژوند بایللی.
د الجزیرې د معلوماتو له مخې، د اسرائيلو او فلسطینیانو د جګړې له پيل راهيسي تراوسه، لږ تر لږه ۳۴ زره او ۶۸۳ فلسطینیانو ژوند بایللی او ۷۸ زره او ۱۸ نور ټپیان شوي دي.
سرچینه زیاتوي چې دې موده کې ۱۱۳۹ اسرائیلي پوځیان هم وژل شوي دي.
Views: 11
