کاناډا کې د متشبثینو لپاره د پانګونې فرصتونه او د سوداګرۍ پیلولو لارښود

پېژندنه:

کاناډا د متشبثینو لپاره یو باثباته او پرمختللی چاپېریال برابروي چې دوی په کې سوداګري پیل کړي او ورته وده ورکړي. کاناډا د پیاوړي اقتصاد، بېلابېلو خلکو او د سوداګرۍ دوستانه چاپېریال په لرلو سره، د افغان متشبثینو لپاره یو په زړه‌پوری انتخاب دی.

په دغه هراړخیز لارښود کې په کاناډا کې د سوداګرۍ فرصتونو په اړه بحث شوی او د افغان متشبثینو لپاره ګام پر ګام لارښوونې چمتو شوې دي. دغه لارښود له لوستونکو سره مرسته کوي چې په کاناډا کې له سوداګریزو فرصتونو خبر شي او یوه بريالۍ سوداګري پيل کړي.

په کاناډا کې د متشبثینو لپاره کاري فرصتونه

معلوماتي ټکنالوجي: د کاناډا د معلوماتي ټکنالوژۍ سکټور په چټکۍ سره وده کوي، په دې برخه کې د سافټویر پراختیا، سایبر امنیت، مصنوعي ځیرکتیا او د معلوماتي تحلیلونو فرصتونو يادونه کولی شو. سوداګر کولی شي دغه صنعت کې په پانګونې سره خپل راتلونکی بدل کړي.

روغتیایي سکټور: په کاناډا کې د روغتیایي پاملرنې سکټور مخ پر ودې روان دی او د یو شمېر خدمتونو لکه طبي کلینیکونو، په کور دننه روغتیایي پاملرنو او د فاصلوي درملنې (telemedicine) په برخه کې تقاضا ډېره ده. د دغه سکټور په ډېرو برخو کې پانګونه مناسبه ګټه تضمین کولی شي.

د تجدید وړ انرژي: دا چې په نړۍ کې د اقلیمي بدلون له امله ورځ تر بلې پاکې او د تجدید وړ انرژۍ ته تقاضا ډېرېږي، نو کاناډا هم د پاکې انرژۍ په پروژو کې پانګونه کوي او د لمریزې، بادي او د اوبو برېښنا تولید کې د سوداګرۍ لپاره فرصتونه رامنځته کوي.

کرنه او کرنیز خوراکي محصولات: د ځایي تولیداتو او عضوي غذايي محصولاتو غوښتنه مخ په ډېرېدو ده او په دې سره د کرنیزې سوداګرۍ او د خوړو پروسس شرکتونو لپاره ډېر فرصتونه په لاس کې دي. له بلې خوا، د کاناډا نفوس هم ورځ تر بلې په ډېرېدو دی او لا زیاتو کرنیزو محصولاتو ته اړتیا لري، د کاناډا پراخه خاوره او د کرنې سکټور کې شته فرصتونه تاسو ته د پانګونې نوي فرصتونه برابروي.

ګرځندوی او مېلمه‌پالنه: د کاناډا رنګارنګې منظرې او کلتوري جاذبې هر کال ملیونونه سیلانیان جلبوي چې له دې سره په هوټلونو، رسټورانټونو او د ګرځندوی برخو کې فرصتونه رامنځته کوي. تاسو کولئ شي چې په دې برخه کې د پانګونې فکر وکړئ.

الکترونیکي سوداګري یا انلاین پېر او پلور: انلاین پېر او پلور په چټکۍ سره وده مومي او په دې توګه د انلاین پېر او پلور لپاره لا ډېر فرصتونه رامنځته کېږي. که چېرته په کور کې کار غواړئ نو دغه سکټور ته سر ورښکاره کړئ، تاسو کولی شئ چې د انلاین پېر او پلور له لارې خپله پانګه ډېره کړئ.

ښوونه او روزنه: د ښوونې او روزنې لپاره د کاناډا ژمنتیا د دې لامل کېږي چې په دې برخه کې فرصتونه ډېر شي. تاسو د دولت د پالیسیو په مطالعې سره په مناسبو برخو کې د پانګونې او ګټې ښه فرصتونه موندلی شئ.

پرچون‌پلورنه: په کاناډا کې د پرچون پلورنې سکټور متشبثینو ته فرصتونه وړاندې کوي چې خپل پلورنځي خلاص کړي او یا هم په تاسیس شوي تجارت کې ګډون او پانګونه وکړي.

تولید: د نوو او لوړ کیفیت محصولاتو غوښتنه چې د الکترونیکي، مشینري او ټوکرونو برخې یې مشهورې دي، د سوداګرۍ لپاره مناسب فرصتونه برابروي.

مسلکي خدمتونه: هغه سوداګرۍ چې په ساحو کې خدمات وړاندې کوي لکه مشورې، محاسبې او حقوقي خدمتونه کولی شي چې د کاناډا په بازار کې فرصتونه رامنځته کړي.

په کاناډا کې د افغان متشبثینو لپاره د سوداګرۍ پیلولو لارښود:

۱- څېړنه او پلان جوړونه: د مارکېټ په برخه کې د پراخې څېړنې او مفصل سوداګریز پلان له جوړولو څخه پیل وکړئ. هغه مارکېټ مشخص کړئ چې تاسو په نظر کې نیولی وي او ورسره خپل سیالان، بالقوه فرصتونه او ننګونې هم تشخیص کړئ. يو مالي پلان په داسې ډول سره جوړ کړئ چې پکې توقع کېدونکي لګښتونه او د عوايدو اټکلونه بيان شوي وي. د مجربو متشبثینو یا سوداګریزو برخو له مشاورینو څخه لارښوونې وغواړئ. دوی ستاسو د پلان په اړه ارزښتناک مسایل او نظرونه وړاندې کولی شي.

۲- د سوداګرۍ جوړښت وټاکئ: د خپلې سوداګرۍ لپاره مناسب قانوني جوړښت لکه انحصاري ملکيت، همکارۍ جوړښت، شراکت یا کوپراتیف غوره کړئ. له یوه قانونپوه متخصص سره مشوره وکړئ، ترڅو د خپلو ځانګړو اړتیاوو لپاره غوره جوړښت وټاکلی شئ او په دې برخه کې ځيني فکټورونه لکه مسؤولیت، مالي اغېزې او مدیریتي جوړښت په پام کې ونیسئ.

۳- خپله سوداګري راجستر کړئ: خپل کاروبار له مناسبو فدرالي، ولايتي، یا سیمه‌ییزو دولتي ادارو سره راجستر کړئ. په کاناډا کې د سوداګرۍ اړوند مسایل د کاناډا د عوایدو له ادارې (CRA) سره راجستر کېږي. هغه ولايت او ځای ته په پام سره چې تاسو سوداګري پکې پرمخ وړئ، تاسو دې ته اړتيا لرئ چې د خپلې سوداګرۍ نوم راجستر او اړين جوازونه ترلاسه کړئ. د بېلګې په توګه، په Ontario کې د خپلې سوداګرۍ نوم د ServiceOntario له لارې راجسترولی شئ. په نورو سیمو کې د دغه ډول راجستريشن لپاره اړونده دولتي ويبپاڼې او نور ځانګړي راجسترېشن شرایط تعقیب کړئ.

۴- ستاسو د سوداګرۍ تمویل: د سوداګرۍ پيلولو لپاره بودجه له خپلو شخصي سپماوو، ملګرو يا کورنۍ څخه د پانګې راجلبولو، بانکي پورونو، دولتي مرستو یا تمويلي پروګرامونو څخه لاسته راوړلی شئ. دغه تمویلي پروګرامونه په ځانګړې توګه د متشبثینو لپاره ډیزاین شوي وي. د هغه مالي پروګرامونو په برخه کې څېړنه او غوښتنه وکړئ چې د کډوالو يا لږکيو سوداګرۍ فعاليتونو ته اړتيا ولري، ځکه چې په دې سره ښايي اضافي ملاتړ او سرچينې درته وړاندې کړلی شي.

۵- سوداګریز بانکي حساب پرانیزئ: کله چې په کاناډا کې د سوداګریز حساب پرانيستلو اراده ولرئ، له لاندې مشهورو بانکونو څخه يو يې وټاکئ:

Royal Bank of Canada (RBC)، Toronto-Dominion Bank (TD)، Bank of Nova Scotia (Scotiabank)، Bank of Montreal او یا Canadian Imperial Bank of Commerce (CIBC). دغه بانکونه بېلابېل سوداګریز خدمات وړاندې کوي او نوو راغلو متشبثینو لپاره د غوره سوداګریزو ملاتړو سرچينو په توګه خدمات وړاندې کولی شي.

د سوداګریز بانکي حساب پرانیستلو لپاره د اړوند بانک محلي څانګې ته مراجعه وکړئ او د خپلو سوداګریزو اړتياوو په اړه ورسره بحث وکړئ. د حساب پرانیستلو لپاره اړتيا لرئ چې خپل هويت، سوداګریزه شمېره او د سوداګرۍ اړوند اسناد چمتو کړئ.

۶- بیمه ترلاسه کړئ: د بیمې پوښښ ترلاسه کولو له لارې خپله سوداګري خوندي کړئ. که څه هم د بیمې لګښت د شرکتونو له لپاره متحول مصارف زیاتوي خو په مقابل کې تاسو ته د خپل کاروبار ښه خوندیتوب درکوي. دا ستاسو صنعت او سوداګریزو فعالیتونو پورې اړه لري، تاسو ممکن د بیمې مختلفو ډولونو ته اړتیا ولرئ، لکه ملکیت، مسؤولیت، یا د سوداګرۍ مداخله بیمه. د بیمې له مسلکیانو سره مشوره وکړئ، ترڅو د سوداګرۍ لپاره مو مناسب پوښښ وټاکئ.

۷- خپل انلاین شتون رامنځته کړئ: د نن ورځې ډیجیټل دور کې، د انلاین شتون درلودل د سوداګرۍ لپاره اړین دي. د ډومین نوم راجستر کړئ او یوه مسلکي ویب‌پاڼه جوړه کړئ چې ستاسو محصولات یا خدمات ښیي. د ټولنیزو رسنیو پلیټ‌فارمونه وکاروئ، لکه فیسبوک، انسټاګرام او لینکډین؛ له احتمالي پېرودونکو سره اړیکه ونیسئ او خپلې سوداګرۍ ته وده ورکړئ. لیدونکو ته د رسېدو لپاره په انلاین اعلاناتو کې پراخه پانګونه وکړئ.

۸- کارکونکي پر دندو وګمارئ: که ستاسو سوداګري اضافي کارمندانو ته اړتیا ولري، په کاناډا کې د استخدام پروسه او د کار قوانین وڅېړئ. په دې ډاډه شئ چې ستاسو لږ تر لږه معاش د کارکوونکو ګټې او د کار ځای خوندیتوب په اړه له ټولو مقرراتو سره سم عمل کړی. د مسلکي او باوري کارکوونکو راجلبولو لپاره د استخدام یوه قوي پروسه رامنځته کړئ.

۹- ګډ کار وکړئ او په ټولنه کې ښکېل شئ: په خپله سیمه کې له نورو متشبثینو، د صنعت متخصصینو او محلي سازمانونو سره اړیکه ونیسئ. د شبکې پېښو، سوداګریزو نندارتونونو او کنفرانسونو کې برخه واخلئ، څو خپله مسلکي شبکه پراخه کړئ او په خپل صنعت کې ارزښتناک ځای ترلاسه کړئ.
له سیمه‌ییزو سوداګریزو ټولنو او د کډوالو ملاتړ سازمانونو سره یو ځای شئ، کوم چې کولی شي سرچینې، لارښوونې او د شبکې فرصتونه چمتو کړي چې په ځانګړې توګه د یو افغان متشبث په توګه ستاسو له اړتیاوو سره سمون لري.

۱۰- خپل پرمختګ وڅارئ: له خپلو سوداګریزو فعالیتونو په منظم ډول بیاکتنه وکړئ او د اړتیا په صورت کې خپلې ستراتیژۍ تنظیم کړئ. په خپل صنعت کې د بازار له جریانونو او بدلونونو سره ځان سم روان کړئ او په دوامداره توګه د ودې او پرمختګ لپاره نوي فرصتونه ولټوئ. له ننګونو سره د تطبیق لپاره چمتو اووسئ او د خپلو پېرودونکو بدلېدونکو اړتیاوو پوره کولو لپاره خپلې سوداګرۍ ته وده ورکړئ.

پایله:

په کاناډا کې د افغان متشبث په توګه د سوداګرۍ پیلول له ننګونو او ګټو سره یو ځای دي. د مسلکي او بشپړې څېړنې په ترسره کولو، د تفصيلي سوداګریز پلان جوړولو او د شته سرچینو او ملاتړ په کارولو سره، تاسو کولی شئ چې په دغه پرمختللي بازار کې بریالۍ سوداګري رامنځته کړئ. هغه فرصتونه او ننګونې ومنئ چې متشبثین ورسره مخ کېږي، د خپلو سوداګریزو اهدافو ترلاسه کولو لپاره سخت کار وکړئ. له هوډ او استقامت سره تاسو کولی شئ چې په کاناډا کې د خپل ځان او خپلې کورنۍ لپاره سوکاله راتلونکی جوړ کړئ.

سرچينې:

1. Government of Canada. (2021). Starting a business.
2. Innovation, Science, and Economic Development Canada. (2021). Business and industry.
3. Canada Revenue Agency. (2021). Register your business.
4. Invest in Canada. (2021). Industries and sectors.
5. Royal Bank of Canada. (2021). Business banking.
6. Toronto-Dominion Bank. (2021). Business banking.
7. ServiceOntario. (2021). Registering your business.
8. BDC. (2021). Financing for starting a business.
9. Canadian Federation of Independent Business. (2021). Starting a business.
10. Statistics Canada. (2021). Small business profile.

Views: 9