پر اسرائیلو د ایران بریدونو ته ځينو هېوادونو او د ملګرو ملتونو سرمنشي غبرګون ښودلی او د دواړو هېوادونو ترمنځ یې د کړکېچ ختمولو غوښتنه کړې ده.
د ملګرو ملتونو سرمنشي انتونیو ګوترېش پر خپلهایکس پاڼه دا بریدونه غندلي دي.
هغه لیکلي: «زه پر اسراییلو د ایران د پراخ برید له امله رامنځته شوی کړکېچ غندم او د دغو شخړو د ژر تر ژره درولو غوښتنه کوم.»
د هغه په خبره، سیمه او نړۍ د بلې جګړې زغم نه لري.
بلخوا، د روسیې ولسمشر ولادیمیر پوتین پر خپله ایکسپاڼه لیکلي چې پر اسرائیلو د ایران، حزب الله او حوثیانو بریدونه ښایي د توکو بیې په نړۍواله کچه لوړې کړي.
نوموړي څرګنده کړې: «غرب له اسرائیلو په ځانګړي ډول پر فلسطین او د غزې پر وګړو برید کې دغه هېواد د ملاتړ لپاره خپله لاره ورکه کړه.»
پوتین زیاته کړې چې مسکو خپلې ټولې هڅې کوي څو له درېیمې نړۍوالې جګړې مخنیوی وکړي.
د روېټرز خبري اژانس د راپور له مخې د بریتانیا لومړي وزیر ریشي سوناک هم دغه برید غندلی دی.
هغه ویلي: «دغه برید د سیمې د بېثباتۍ او د شخړو ډېرېدو خطر له ځان سره لري او ایران یو ځل بیا وښوده چې غواړي په سیمه کې کړکېچ پیدا کړي.»
نوموړي له اسرائیلو څخه د ملاتړ پر دوام ټینګار کړی دی.
په ورته وخت کې، د کاناډا لومړي وزیر جاسټین تروډو د دغې موضوع په غبرګون کې ویلي: «موږ د اسرائیلو ترڅنګ ولاړ یو، دغو بریدونو یو ځل بیا د سیمې د ثبات او سولې په اړه د ایران بېاعتنایي وښوده، موږ له اسرائیلو څخه د ځان او خپلو خلکو د د دفاع لپاره ملاتړ کوو.»
په ورته وخت کې، تسنیم خبري اژانس د حماس له قوله لیکلي: «پر اسرائیلو د ایران برید یو ښه ځواب و.»
دغهراز، د روېټرز د راپور له مخې د چین د بهرنیو چارو وزارت ویلي چې پر اسرائیلو د ایران له برید وروسته په منځنۍ ختیځ کې د شخړو ډېرېدو ته سخت اندېښمن دي.
دغه وزارت زیاته کړې: «چین له دواړو لورو غواړي چې د تاوتریخوالو ډېرېدو د مخنیوي په موخه له زغم کار واخلي او حوصله دې وکړي.»
له بلې خوا، پاکستان پر اسراییلو د ایران وروستي برید ته په غبرګون کې په منځني ختیځ کې پر روان وضعیت اندېښنه ښودلې او له دواړو لورو يې غوښتي چې له زغم څخه کار واخلي او تاوتریخوالی کم کړي.
د پاکستان د بهرنیو چارو وزارت په یوه خبرپاڼه کې ویلي، په منځني ختیځ کې نننی وضعیت د ډیپلوماسۍ د له منځه تلو ښکارندويي کوي.
سرچینې زیاته کړې چې د ملګرو ملتونو امنیت شورا د نړۍوالې سولې او امنیت په تامینولو او د خپلو مسوولیتونو په ترسره کولو کې پاتې راغلې ده.
په ورته وخت کې، د ایران د بهرنیو چارو وزارت په یوه خبر پاڼه کې ویلي چې د دغه هېواد وسلهوال پوځ د ملګرو ملتونو منشور د ۵۱ مادې مطابق او د سوریې په غوښتنه د اسرائیلو د پرله پسې بریدونو په ځواب بوخت وو، د اسراییلو پر نظامي اډو یې یو لړ بریدونه ترسره کړل.
دغه وزارت زیاته کړې: «د ایران اسلامي جمهوریت د ملګرو ملتونو اصولو، منشور او نړۍوالو حقوقو ته پر خپلې ژمنتیا د ټینګار ترڅنګ له خپلې ځمکنۍ بشپړتیا، ملي ګټو او حاکمیت څخه د پرېکنده دفاع لپاره پر خپلې قوي ارادې هم ټینګار کوي.»
اسوشېټېډپرېس د اسرائیلو د پوځ د ویاند دانیل هاګري له قوله راپور ورکړی چې د تر درې سوه ډېر توغندي پر دغه هېواد توغول شوي، خو د ۹۹ سلنه یې مخه نیول شوې ده.
د هغه په خبره، ایران ۱۷۰ ډرون، ۳۰ کروز او څه باندې ۱۲۰ بالستیک توغندي توغولي دي چې له دې ډلې څو بالستیک توغندي د اسرائیلو خاورې ته رسېدلي او ډېر لږ زیان یې یوې هوایي اډې ته اړولی دی.
Views: 6
