د ا مریکا د متحدو ایالتونو د باسټن پوهنتون ډاکټران وايي چې په لومړي ځل او په بریالي ډول یې د خنزیر پښتورګې (ګردې) یو انسان ته پیوند کړ.
ډاکټران وايي په ژینیټیکي توګه د خنزیر دا پښتورګی د پښتورګو په رنځ اخته بیمار لپاره برابر و.
د باسټن ایالت د ماسچوسیتس عمومي روغتون په یوې اعلامیې کې اعلان وکړ چې یو ژوندي انسان ته د خنزیر د پښتورګي انتقال او پیوند د خپل ډول لومړي بریالي عملیات دي.
تر دې مخکې د مغزي سکتې بیمار ته د حیوان د بدن د غړو د موقتي انتقال او نصب هڅه شوې وه چې انسان ته د خنزیر د زړه د انتقال دوه ناکام عملیاتونه هم په کې شامل وو.
ډاکټران وايي چې دا رنځور ریچارد ریک سلیمن نومېږي، ۶۲ کلن او د ماسچوسیتس د وایموت سیمې اوسېدونکی .
دوی زیاته کړې چې تر پیوندکارۍ وروسته دغه ناروغ اوس په رغېدو دی او ژر به له روغتون څخه خپل کور ته رخصت شي. دا عملیات د همدې میاشتې په سر کې شوي.
د ماس جنرال بریکهم روغتون مشرې ان کلبانسیکي وویل چې د روغتون ډاکټران او محققان یې د طبي تغیر او د هغو ناروغیو د درملنې لپاره، چې رنځوران ورسره په ورځني ژوند کې مخامخ دي، د ساینس او علم داسې بریدونو ته ځانونه رسوي.
هغې زیاته کړې: «د پښتورګو له لومړي بریالي عملیاتو تقریبآ اووه لسیزې وروسته، زموږ ډاکټرانو یو ځل بیا ثابته کړه چې مبتکرانه درملنه او زموږ او په نړۍ کې د نورو رنځورانو د رنځ په اسانه کولو کې مرسته کولای شي.»
له لسیزو ناکامو تجربو وروسته دغه عملیات د پام وړ او لوی پرمختګ بلل کېږي.
Views: 11
