د ۱۴۰۲ هجری لمريز کال د کب ۲۹مه
د طالبانو له واکمنۍ سره د افغان وطن د لوڼو درې پرله پسې تعليمي کلونه له هر ډول موجه دليل پرته په اوبو لاهو شول او دا دی څلورم تعليمي کال هم په پيلېدو دی، خو لا هم د رڼا هېڅ څرک نه ښکاري.
د نجونو پر زده کړو د بنديزونو په اړه تر اوسه له ولس سره هېڅ ډول صادقانه معلومات او دلايل ندي شريک شوي، بلکې يوازې د ثاني امر خبره کېږي. ثاني امر چې پخپله يو مجهول امر دی، پدې دلالت کوي چې چارواکي د ملت لپاره د منلو وړ کوم دليل نلري.
ويل کېږي چې اکثريت طالب چارواکي د نجونو د تعليم پلويان دي، خو بيا هم پدې برخه کې هېڅ پرمختګ نه ليدل کېږي. دا پدې معنا ده، چې يا خو دوی پخپلو خبرو کې صادق ندي او د ملت د غولولو لپاره تمثيل کوي؛ يا خو د دوی واک هم د ځينو پخوانيو رژيمونو په څېر د پردیو په لاس کې دی او د ملت پر ضد پرېکړې ورباندې تحميلېږي؛ او يا خو د دوی اراده هم د ملت په څېر يوازې د يوه کس له خوا د ناڅرګندو او شکمنو دلايلو له مخې يرغمل شوې او دوی هم تر اسلامي ارزښتونو او ملي ګټو خپلو شخصي ګټو او چوکيو ته زيات اهميت ورکوي او خپل غږ نه پورته کوي.
موږ يو ځل بيا يادونه کوو، چې د واکمنې ادارې د ناسمو پرېکړو له کبله د افغانستان ملي ګټو او حيثيت ته ډېر درانه زيانونه رسېدلي، نيمايي ټولنه له خپل مسلم انساني او اسلامي حق څخه بې برخې شوې او له راز راز ټولنيزو او رواني ستونزو څخه کړېږي او په لکونو کورنيو د خپلو بچيانو د تعليم لپاره د مهاجرت سختيو او کړاوونو ته غاړه اېښې ده. موږ پر اوسنيو واکمنانو غږ کوو، چې نور دې تاريخي مسئوليتونه او بدنامۍ پر غاړه نه اخلي، له ملت سره دې له تقابل او دښمنۍ څخه ډډه وکړي او د افغان وطن لوڼو ته دې اجازه ورکړي چې د خپل خدای ورکړي انساني او اسلامي حقونو پر بنسټ ښوونځيو او پوهنتونونو ته لاړې شي.
سره له دې چې په نسبي ډول د امنيت فضا موجوده ده، د افغانستان مسلمان ولس د نجونو له اسلامي حجاب سره کومه ستونزه نه لري او د ښوونځيو په نصاب کې هم اسلامي او ملي ارزښتونه په ډېر دقت سره ساتل شوي او د سمون دروازې يې هم هر وخت خلاصې دي؛ خو که دا ځل بيا هم د ښوونځيو دروازې تړلې پاتې شي، نو دا به په څرګند ډول د نجونو له تعليم سره د دښمنۍ په معنا وي او د نجونو له تعليم سره دښمني په واقعيت کې د افغانستان له ملي ګټو، خپلواکۍ، سوکالۍ او سرلوړۍ سره دښمني ده.
تاريخ ثابته کړې ده، چې هېڅوک د پوهې او رڼا مخه نه شي نيولی او يوازې به هغه مخونه تورېږي چې د جهل ننګه او ملاتړ کوي. که د نجونو پر مخ د زده کړو دروازې همداسې تړلې پاتې شي، د ولس شک به په یقين بدل شي، چې طالبانو له تېرو درسونو هېڅ زده کړه نده کړې، د اصلاح او بدلانه اميد يې نشته او د اوسني نظام له دوام سره به افغانستان يو ځل بيا د تباهۍ کندې ته لوېږي او پدې توګه به د هر افغان ملي او اسلامي وجيبه وي، چې هېواد له تباهۍ څخه وژغوري او د اوسني نظام د بدلانه لپاره عملي خو سوله ييزې مبارزې ته مخه کړي.
و ما علينا الاالبلاغ المبين
Views: 21
