د امریکا متحده ایالتونو د انساني قاچاق په اړه خپل کلني راپور کې افغانستان، چین او روسیه د دغه قاچاق له پلوه د نړۍ تر ټولو بدو هېوادونو په کتار کې راوستلي دي.
په دغه راپور کې چې د غبرګولي په ۲۵مه خپور شوی، افغانستان د هغو ۱۱ هېوادونو په نوملړ کې شامل دی چې حکومتونه یې د انساني قاچاق، د حکومت په تمویل شویو پروګرامونو کې د قاچاق، د حکومت اړوندو چارو او یا ټولو برخو کې د اجباري کار، په حکومتي کمپونو کې د انسانانو د غلام ګرځولو او د ماشومانو د جذب او جلب لپاره تګلارې او مستندې طرحې لري.
دغهراز، د امریکا د بهرنیو چارو وزارت په دغه کلني راپور کې افغانستان د هغو هېوادونو په لست کې راغلی چې د ۲۰۲۱ کال د اپریل له میاشتې بیا د ۲۰۲۲ د مارچ تر میاشتې یې حکومتونو د وسلهوالو ډلو ننګه کړې، ماشومان یې جنګي لیکو ته جذب کړي او یا یې ترې ناسمه استفاده کړې ده.
دا په داسې حال کې ده، چې د افغانستان سرپرست حکومت تېر کال وویل چې ماشومان یې له خپلو لیکو ایستلي دي. د امر بالمعروف وزارت سپارښتنه کړې وه چې کمعمره ماشومان او بېږېرې هلکان جلب او جذب نه کړي.
دغهراز طالبانو ویلي چې افغانستان کې هېڅ وسلهوالې ډلې ته د فعالیت اجازه نه ورکوي.
ملګرو ملتونو څو ورځې مخکې په یو راپور کې ویلي چې د ۲۰۲۱ کال د اګست له ۱۵مې شاوخوا درې نیم میلیون افغانانو هېواد پراېښی دی او ډېری یې پاکستان او ایران ته تللي او هڅه کوي چې له دې لارو اروپا او نورو هېوادونو ته ځانونه ورسوي.
Views: 20
