د راپورونو له مخې، په کینیا کې د تېلو د بیو د سخت لوړوالي پر ضد د پراخو لاریونونو په پایله کې لږ تر لږه څلور کسان وژل شوي او ۳۰ نور ټپیان شوي دي.
کینیا تېره اوونۍ د نفتي موادو بیې تر ۲۳.۵ سلنې پورې لوړې کړې دي؛ دا اقدام وروسته له هغه وشو چې تېره میاشت هم بیې ۲۴.۲ سلنه لوړې شوې وې، چې له امله یې پر خلکو فشار نور هم زیات شوی دی.
د کینیا چارواکو ویلي، د نړۍ د نفتو بازار بېثباتي او د ایران جګړه د تېلو د بیو د لوړېدو اصلي لاملونه دي. د هرمز تنګي تړل کېدل، چې د نړۍ د نفتو د لېږد یوه مهمه لار ده، د کینیا په ګډون د تېلو واردوونکو هېوادونو ته اغېزمن تمام شوي دي.
الجزیرې راپور ورکړی چې د تېلو د بیو له لوړېدو وروسته د دوشنبې ورځې لاریونونه د دغه هېواد په بېلابېلو ښارونو کې پیل شول، چې له امله یې تګراتګ ګډوډ او د عامه ترانسپورټ پراخ اعتصاب رامنځته شو.
د کینیا د کورنیو چارو وزارت اعلان کړی چې د دغو لاریونونو پر مهال ۳۴۸ کسان هم نیول شوي دي.
د پولیسو د راپور له مخې، د لاریونوالو د خورولو لپاره له اوښکېبهوونکي ګاز څخه کار اخیستل شوی او لاریونوالو هم د سړکونو په تړلو او د ټایرونو په سوځولو خپلو اعتراضونو ته دوام ورکړی دی.
سرچینې لیکلي چې د دغو لاریونونو په پایله کې لږ تر لږه څلور کسان وژل شوي او ۳۰ نور ټپیان دي، او د ترانسپورټ اتحادیو له حکومت څخه غوښتي چې د تېلو د بیو د لوړولو وروستۍ پرېکړه بېرته واخلي.
Views: 8
