د پاکستان د بلوچستان ایالت د مستونګ سیمې په یوه ګمرکي ګودام کې د پراخې اورلګېدنې له امله لږ تر لږه ۳۵ کسان ټپیان شوي چې د څلورو تنو روغتیايي وضعیت نازک ښودل شوی دی.
دغه اورلګېدنه د یکشنبې په ورځ د کویټې ـ کراچۍ پر لویه لار د لکپس په سیمه کې رامنځته شوې او وروسته د مایع ګاز (LPG) یو ټانکر هم چاودېدلی دی.
ځايي چارواکو ویلي چې اور لومړی د ګمرک د ضبط شوو توکو په ګودام کې پیل شو او وروسته د موټرو او د سوځېدونکو موادو د ټانکرونو تمځای ته وغځېد.
د کویټې د اوروژنې ادارې مشر عبدالحق اڅکزي ویلي چې د اور شدت ډېر زیات و او د ګازو او نفتي موادو د څو ټانکرونو شتون د اور د مهارولو عملیات سخت کړي وو.
د چارواکو په وینا، د ګاز ټانکر چاودنې پراخ مالي زیانونه اړولي او د میلیاردونو روپیو په ارزښت توکي په اور کې سوځېدلي دي.
راپور زیاتوي چې ټول ټپیان د درملنې لپاره د کویټې ښار روغتونونو ته لېږدول شوي او ځايي حکومت په دولتي روغتونونو کې بېړنی حالت اعلان کړی دی.
د مستونګ چارواکو د اور د خپرېدو د خطر له امله د کویټې ـ کراچۍ پر ملي لویه لار تګ راتګ هم لنډمهاله بند کړی و.
تر اوسه د اورلګېدنې اصلي لامل نه دی معلوم او په اړه یې څېړنې روانې دي.
Views: 16
