چارواکي وایي، د پاکستان پوځي رژیم تېره شپه او ورځ د کونړ پر بېلابېلو سیمو د توپ ۸۵ ډزې کړې چې له امله یې دوه ملکي وګړي شهیدان او اته نور ټپیان شوي او د افغان ځواکونو په برید کې د پاکستان درې پوستې ویجاړې شوې دي.
د کونړ د اطلاعاتو او فرهنګ ریاست د اطلاعاتو امر ضیاالرحمن سپینغر پژواک ته وویل چې د پاکستان پوځي رژیم په تېره یوه شپه او ورځ کې د توپ ۸۵ ډزې کړې دي.
د هغه د معلوماتو له مخې، د دغه ولایت په ناړۍ ولسوالۍ کې ۱۶ مرمۍ لګېدلې چې له امله یې یو ملکي وګړی شهید او ۶ نور ټپیان شوي دي.
ضیاالرحمن سپینغر وایي چې پاکستاني ځواکونو دوه ځلې د ډرون بریدونه کړي او ټولټال یې ۴۷ د لرې واټن ویشتونکې مرمۍ هم توغولي دي. د دغو بریدونو له امله نن سهار د سرکاڼو په مرکز کې یو ملکي وګړی شهید او ۲ نور ټپیان شوي دي.
هغه وایي چې د دغه ولایت په منوره ولسوالۍ کې دوه، په شلتن ولسوالۍ کې ۱۵ او په مرکز اسعداباد او شاوخوا سیمو کې هم پنځه توغندي لګېدلي چې زیان نه لري.
د کونړ د اطلاعاتو او فرهنګ ریاست د اطلاعاتو امر د معلوماتو له مخې، د سرکاڼو ولسوالۍ د نواپاس سیمه د ډیورنډ پر فرضي کرښه د افغان سرحدي ځواکونو د برید په پایله کې د پاکستان پوځي رژیم درې پوستې ویجاړې شوې او یو تن یې وژل شوی دی.
Views: 9
