افغانستان لپاره د امریکا او اسلامي همکاریو سازمان ځانګړو استازو د بشري او اقتصادي موضوعاتو ترڅنګ د بېرته راستنېدونکو افغان کډوالو په اړه خبرې کړې دي.
په جده کې د اسلامي همکاریو سازمان لخوا په یوه خپره شوې خبرپاڼه کې راغلي، چې افغانستان لپاره د امریکا ځانګړي استازي ټام ویسټ افغانستان لپاره ددغه سازمان ځانګړي استازي طارق علي بخیت سره د سه شنبې په ورځ ولیدل.
سرچینې زیاته کړې، په دې لیدنه کې دواړو لوریو پر ګډو همکاریو او ګډو ګټو د خبرو ترڅنګ په افغانستان کې پر بشري، اقتصادي موضوعاتو او نورو ننګونو باندې خبرې وکړې.
بلخوا افغانستان لپاره د امریکا ځانګړي استازي ټام ویسټ پر اېکس شبکې لیکلې، چې د اسلامي همکاریو سازمان ځانګړي استازي سره یې د یادو موضوعاتو ترڅنګ د بېرته راستنېدونکو کډوالو، دافغانانو او په ځانګړې توګه د ښځو او نجونو د بشري حقونو په اړه په تفصیل سره خبرې وکړې.
هغه زیاته کړې چې دغه راز یې د اسلامي پراختیایي بانک له مسوولینو سره یې هم په افغانستان کې بېړنیو مرستو به تړاو خبرې کړې.
Views: 10
