په غزني ولایت کې واکمنې ادارې د خوشحال راډیو دفتر د نجونو له لوري له دې رسنۍ سره د ټیلیفوني اړیکو له امله تړلی او د ځايي چارواکو په امر د دې خصوصي راډیو خپرونې درول شوې دي. د افغانستان د خبریالانو مرکز د دې راډیو تړل د ټولو وګړو، په ځانګړي ډول د ښځو د غږ په منعکسولو کې د یوې ازادې رسنۍ له بنسټیزو حقونو څخه ښکاره سرغړونه بولي او غندي یې.
په غزني کې یوې باخبره سرچینې د افغانستان د خبریالانو مرکز ته وویل، چې خوشحال راډیو پرون وتړل شوه. د غزني د واکمنې ادارې مطبوعاتي دفتر په یوه خبرپاڼه کې ویلي، چې دا راډیو « له دیني، کلتوري او ټولنیزو ارزښتونو څخه د سرغړونې له امله د ولایتي فرهنګي کمېټې له خوا تړل شوې او فعالیت یې ځنډول شوی دی.»
په دې خبرپاڼه کې نور جزییات نه دي ورکړل شوي، خو په غزني کې یوې سرچینې د افغانستان د خبریالانو مرکز ته وویل، چې خوشحال راډیو ډېری تعلیمي پروګرامونه خپروي او هغه نجونې، چې د واکمنې ادارې د محدودیتونو له امله له منځنیو او لوړو زده کړو له حق څخه محرومې شوې دي، له دې خپرونو څخه ګټه اخلي. د نوموړي په وینا، ځینو نجونو د تعلیمي پروګرامونو د ښه تعقیب او زده کړې لپاره له خوشحال راډیو سره ټیلیفوني اړیکې نیولې، چې دې کار د واکمنې ادارې د چارواکو غوسه راپارولې وه.
د ښځو پر لوړو زده کړو د بندیز ترڅنګ، د نجونو له خوا له رسنیو سره ټیلیفوني اړیکې هم سختې محدودې شوې دي او حتا په ځینو ولایتونو کې رسنیو ته په رسمي ډول خبر ورکړل شوی، چې د ښځو د غږ خپرول په بشپړه توګه منع دي.
خوشحال راډیو د ۱۴۰۳ کال په پیل کې په غزني ښار کې په فعالیت پیل وکړ. دې خصوصي رسنۍ سیاسي، اقتصادي، ټولنیزې، فرهنګي او دیني پروګرامونه جوړول او خپرول. له دې وړاندې د خوشحال راډیو دوه مسؤول مدیران د طالبانو او د خلکو د ټولنیز وضعیت په تړاو د لیکنو او نظر څرګندولو له امله نیول شوي وو او څه موده یې په زندان کې تېره کړه.
د افغانستان د خبریالانو مرکز په غزني کې د واکمنې ادارې له لوري د خوشحال راډیو تړل د یوې ازادې رسنۍ په چارو کې ښکاره لاسوهنه بولي او غندي یې. څرګنده ده چې یوه ازاده رسنۍ باید د ژورنالیزم د اصولو او معیارونو پر بنسټ کار وکړي او وګړي، په ځانګړي ډول هغه ښځې چې د واکمنې ادارې د محدودیتونو له امله له لوړو زده کړو څخه محرومې دي، باید لږ تر لږه د آنلاین زده کړو له لارې د زده کړې له حق څخه محرومې نه شي.
د افغانستان د خبریالانو مرکز په غزني کې د واکمنې ادارې له چارواکو څخه غواړي، چې په خپلې پرېکړې له سره غور وکړي او ژر تر ژره خوشحال راډیو ته اجازه ورکړي، چې د یوې ازادې رسنۍ په توګه خپل فعالیت بیا پیل کړي. واکمنه اداره باید د ازادو رسنیو له ګواښلو او مجازاتولو لاس واخلي او د رسنیو د ځپلو، د محدودیتونو د زیاتولو او د خپلو غوښتنو تحمیلولو پرځای، چې ممکن د هغوی د ګټو له تغییر سره بدلون ومومي، داسې پرانیستی او له وېرې پرته چاپېریال رامنځته کړي، چې د ټولو غږ واورېدل شي.
Views: 15
