د امریکا متحده ایالتونو ولسمشر ډونالډ ټرمپ ویلي چې په ایران کې د حکومت بدلون ښايي «تر ټولو غوره اقدام» وي.
د ایران او امریکا ترمنځ وروستي مذاکرات یوه اونۍ مخکې د عمان په پلازمېنه مسقط کې ترسره شول.
د ایران د بهرنیو چارو وزارت د دغو مذاکراتو له پای ته رسېدو وروسته ویلي وو چې دواړو لورو د خپلو لیدلورو او غوښتنو تر څرګندولو وروسته هوکړه وکړه څو د راتلونکو پړاوونو په اړه له خپلو حکومتونو سره تر سلا مشورو وروسته پرېکړه وکړي.
د امریکا ولسمشر ډونالد ټرمپ هم د ایران او امریکا د استازو له خبرو څو ساعته وروسته، له امریکا سره د هوکړې پر اړتیا د ټینګار ترڅنګ خبرداری ورکړی و چې که دغه کار ونه شي، نو تهران ته به ښې پایلې ونه لري.
په همدې حال کې، د بيبيسي د راپور له مخې، ډونالډ ترمپ تازه په شمالي کارولاینا کې د دې پوښتنې په ځواب کې چې ایا په ایران کې د حکومت بدلون غواړي که نه؟ ویلي: «داسې ښکاري چې دا تر ټولو غوره کار دی چې کېدای شي رامنځته شي.»
هغه د دې له ویلو ډډه کړې چې څوک باید په ایران کې واک ترلاسه کړي، خو زیاته کړې یې ده: «ځیني کسان شته.»
نوموړي ټینګار کړی: «۴۷ کاله کېږي چې هغوی تل خبرې کوي؛ خبرې کوي او بیا هم خبرې کوي. موږ ډېر انسانان له لاسه ورکړي … نو راځئ وګورو چې څه کېږي.»
دا په داسې حال کې ده چې ټرمپ له دې وړاندې هم ایران په برید ګواښلی او ویلي یې دي چې د امریکا جنګي بېړۍ په سیمه کې ځای پر ځای شوې دي.
د ایران د بهرنیو چارو وزیر سیدعباس عراقچي د عمان په مذاکراتو کې له امریکا سره خبرې «یو ښه پیل» بللی او له الجزیرې سره په مرکه کې یې، د خبرو پر دوام د ټینګار سربېره ویلي، که واشنګټن پر ایران پوځي برید وکړي، نو تهران به په سیمه کې د امریکا پوځي اډې په نښه کړي.
Views: 2
