د راپورونو له مخې، د اسلاماباد په ترلایي سیمه کې د جمعې لمانځه پر مهال د چاودنې له امله لږ تر لږه ۱۵ کسانو ژوند له لاسه ورکړی او لسګونه نور ټپيان دي.
اکسپرس ټریبیون راپور ورکړی چې دغه چاودنه نن د جمعې د لمانځه پر مهال، د پاکستان د پلازمېنې اسلاماباد د ترلایي سیمې په «خدیجتالکبری» جومات کې رامنځته شوې ده.
په راپور کې راغلي: «بریدکوونکي وروسته له هغه چې د جومات په دروازه کې ودرول شو، پر ځان تړلي چاودېدونکي توکي یې وچول.»
سرچینې لیکلي چې له دې پېښې وروسته د اسلاماباد په روغتونونو کې بېړنی حالت اعلان شوی او د ټپیانو د لېږد بهیر لا هم روان دی.
د پاکستان د طبي علومو انستیتیوت (PIMS) مسوولینو ویلي چې تر اوسه ۱۱ مړي او ۶۰ ټپیان دې روغتون ته لېږدول شوي او د دغه روغتون د ټپیانو د منلو ظرفیت بشپړ شوی دی.
په راپور کې همدارنګه ویل شوي چې د پلازمېنې پر روغتونونو د فشار له امله، یو شمېر ټپیان د اسلاماباد نورو سیمو او د راولپېنډۍ ښار روغتونونو ته لېږدول شوي دي.
اکسپرس ټریبیون لیکلي چې تر دې دمه د دې چاودنې له امله لږ تر لږه ۱۵ کسانو ژوند له لاسه ورکړی او ۸۰ نور ټپیان شوي دي.
په همدې حال کې، د پاکستان پولیسو او د پوځ ځواکونو د پېښې سیمه کلابنده کړې او د چاودنې په شاوخوا کې امنیتي عملیات روان دي.
د پاکستان لومړي وزیر شهباز شریف دا برید په کلکه غندلی او د قربانیانو له کورنیو سره یې خپله خواخوږي شریکه کړې ده
Views: 13
