د امریکا د متحدو ایالتونو د سنا د بهرنیو اړیکو کمېټې هغه طرحه تصویب کړې، چې موخه یې د افغانستان حکومت ته د دې هېواد د مرستو د رسېدو مخنیوی دی.
د راپورونو له مخې، دغه طرحه تازه د امریکا د سنا د بهرنیو اړیکو کمېټې له لوري تصویب شوې، چې هدف یې طالبانو ته د امریکا د مالي مرستو د لېږد مخنیوی بلل شوی دی.
د یادې کمېټې مشر جیم ریش ویلي، چې د افغانستان د جګړې پر مهال تر دوو زرو زیات امریکایان وژل شوي او له شلو زرو ډېر نور ټپیان شوي دي. هغه افغانستان ته د امریکايي مالیه ورکوونکو د پیسو لېږد «د افغانستان د جګړې د قربانیانو سپکاوی» بللی دی.
په ورته وخت کې، د طالبانو ویاند ذبیحالله مجاهد ویلي، چې متحده ایالتونو دوی ته هېڅ مالي مرسته نه ده استولې، بلکې دا پیسې د نړیوالو بشري مرستندویه سازمانونو له لارې افغانستان ته د مرستو د رسولو لپاره لېږل شوې دي.
Views: 1
