د نړۍوالو رسنیو د راپورونو له مخې، د ګرینلنډ د راتلونکي په اړه د سیاسي ترینګلتیاوو په اوج کې یو شمېر اروپايي هېوادونو دغه ستراتيژیک ټاپو ته د محدودو پوځي ځواکونو په استولو سره له ډنمارکه خپل عملي ملاتړ وښود.
دغه اقدام په داسې حال کې شوی چې کپنهاګ د ناټو د دایمي حضور پر پراخولو ټینګار کوي او هممهاله د ډونالډ ټرمپ له لوري د دغه قلمرو د نیولو جنجالي ادعاوې بیا تکرار شوې دي چې واشنګټن ته د یووالي او له دغه کاره د ډډې کولو څرګند پیغام لېږي.
د رویټرز د راپور له مخې، اروپايي هېوادونو د پنجشنبې په ورځ یو شمېر محدود پوځي ځواکونه ګرینلنډ ته واستول؛ هممهاله ډنمارک اعلان وکړ چې د دغه ټاپو د امنیت د ټینګښت لپاره، چې د امریکا د ولسمشر ډونالډ ټرمپ د پام وړ ګرځېدلی، د ناټو د «پراخ او دایمي» حضور لپاره خپل پلانونه تعقیبوي.
سرچینې لیکلي چې د دغو محدودو ځواکونو استول، چې د پوځي تمرینونو لپاره له ډنمارک سره د مرستې په موخه دي، د امریکا، ډنمارک او ګرینلنډ د چارواکو ترمنځ له هغې ناستې یوه ورځ وروسته وشول، چې بې له کوم د پام وړ پرمختګه پای ته ورسېده، او د قوي ملاتړ پیغام یې ورساوه.
په راپور کې راغلي چې له یادې ناستې وروسته، ټرمپ یو ځل بیا خپله دا ادعا تکرار کړه چې که روسیه یا چین د ګرینلنډ د نیولو اراده ولري، نو د دې خپلواکې خاورې ساتنې لپاره پر ډنمارک تکیه کېدای نه شي.
ټرمپ ویلي، دغه ټاپو چې ستراتيژیک موقعیت او بډایه معدني سرچینې لري، د امریکا د امنیت لپاره حیاتي دی او د هغه د نیولو لپاره د زور کارول یې نه دي رد کړي. خو ګرینلنډ او ډنمارک وايي چې دغه ټاپو د پلور لپاره نه دی او د زور د کارولو ګواښ بېپروا او خطرناک دی.
د رویټرز د راپور له مخې، د ډنمارک د دفاع وزیر ترولس لوند پولسن د پنجشنبې په ورځ په کپنهاګ کې خبریالانو ته وویل چې تر اوسه په ګرینلنډ کې د ناټو د حضور د پراخولو وروستۍ شمېره نه ده ټاکل شوې.
په راپور کې د ډنمارک د دفاع وزیر له قوله راغلي: «خو دا روښانه ده چې اوس کولای شو د ۲۰۲۶ کال په اوږدو کې د یوه پراخ او دایمي حضور لپاره پلان جوړ کړو، او دا د دغه ټکي ښودلو لپاره حیاتي دی چې په شمالي قطب کې امنیت یوازې د ډنمارک په پاچاهۍ پورې محدود نه دی، بلکې په ټوله ناټو پورې تړاو لري.»
Views: 11
