د پاکستان یوې محکمې د دغه هېواد پخوانی لومړی وزیر عمران خان او د هغه مېرمن بشرا بيبي په یوه بله قضیه کې پر ۱۷ – ۱۷ کاله نور بند محکوم کړي دي.
د عمران خان د کورنۍ وکیل رانا مدثر عمر نن (شنبه) رویټرز خبري اژانس ته ویلي: «محکمې د دفاع له اورېدو پرته پرېکړه اعلان کړه او عمران خان او بشرا بيبي یې د درنو جریمو ترڅنګ پر ۱۷- ۱۷ کاله بند محکوم کړل.»
د راپور له مخې، د پاکستان د فدرالي پلټنو ادارې اعلان کړی چې هغوی د پاکستان د جزا قانون له مخې په امانت کې د خیانت په جرم پر لس کاله بند او له فساد سره د مبازې قوانینو له مخې پر اوو نورو کلونو بند محکوم شوي دي.
د عمران خان ویاند ذوالفي بخاري هم ویلي چې دا پرېکړه «د عدالت لومړني اصول له پامه غورځوي» او دغه بهیر «د انتخابي قانوني تعقیب لپاره پر یوې وسیلې» بدلوي.
ورته مهال، د عمران خان بل وکیل سلمان صفدر له زندانه بهر د محکمو ترسره کېدو ځای کې خبریالانو ته وویل، خان خپل حقوقي ټیم ته لارښوونه کړې څو د دې پرېکړې پر وړاندې د اسلاماباد عالي محکمې ته اعتراض وکړي.
د پاکستان د اطلاعاتو او رسنیو وزیر عطاالله طرار ویلي چې د عمران خان د بند موده به د نننۍ پرېکړې له مخې، د ځمکې د اختلاس د قضیې د ۱۴ کلن بند له تېرولو وروسته پیل شي.
د یادونې ده، په مرغومي میاشت کې هم د پاکستان یوې محکمې عمران خان او د هغه مېرمن د فساد د یوې بلې دوسیې په تړاو مجرمین پېژندلي او هغوی یې په ترتیب پر ۱۴ او اوو کلونو بند محکوم کړي وو او دا مهال دواړه په زندان کې دي.
Views: 10
