ډېرو کسانو د افغانستان پر خاوره د پاکستان د پوځي رژیم د تېرې شپې بریدونه غندلي، د غچ اخيستلو ګواښونه یې کړي او له افغانستان څخه یې غوښتي چې دا بریدونه بېځوابه پرې نه ږدي.
د راپورونو له مخې، تېره شپه دوولس بجې د خوست په ګربزو ولسوالۍ کې پاکستان د یوه ملکي کس کور بمبار وکړ چې د ښځو او ماشومانو په ګډون نهه کسان پهکې شهیدان شول. دغهراز پاکستان په کونړ او پکتیکا کې هم هوایي بریدونه کړي چې پهکې څلور ملکي کسان ټپيان شوي دي.
پر ټولنیزو پاڼو د خلکو غبرګونه:
عبدالقادر جلالزي لیکلي: “دا پېښه د بشري وجدان د زغملو نه ده. د خوست د مظلومو ماشومانو او ښځو پر وړاندې دا وحشیانه برید هغه ظلم دی چې هېڅ ډول توجیه نه لري او د هر افغان د زړګي له تل څخه ورته غاښونو چیچل کېږي. دا برید پر یوې کورنۍ نه، بلکې د انسانیت پر تقدس برید دی. د افغانستان ولس د داسې جنایتونو حساب هېڅکله نه هېروي. د حق چیغه به تل لوړه وي، او د هر بېگناه وژل شوي ماشوم غږ به د عدالت تر دروازو پورې رسیږي. دا کار د یو دولت د کمزورۍ نښه نه ده، بلکې د هغه چا د شکست چیغه ده چې خپل زور د معصومو پر وینو ثابتوي.»
محمد فاروق لیکلي: «دا ځل يې اول باید سفارت ور وتړل شي او ټول ډیپلوماتان يي په ۴۸ ساعتونو کې اخراج شي او په دویم قدم کې باید غاښ ماتوونکی ځواب ورکړل شي او د هغو تنکيو ماشومانو غچ باید تري واخستل شي چې د پاکستان پوځي رژیم لخوا په افغانستان کي په نښه شوي دي او په شهادت ورسیدل.»
محمد ارمان لیکلي چې د افغانستان د خلکو وینه هېڅکله ارزانه نه ده او هر بېګناه افغان چې زیان ویني، د هغه درد ټول ملت احساسوي.
هغه زیاتوي: «د سیمې اوسنی حالت ډېر د اندېښنې وړ دی، خو تمه لرو چې افغانستان په هوښیارۍ، تدبیر او ملي موقف سره ځواب ورکړي. موږ د یو قوي، باوقاره او خپلواکه افغان حکومت ملاتړ کوو—هغه حکومت چې د خلکو امنیت، عزت او ملي ګټې د هر څه نه زیات مهم ګڼي.»
امین محمد لیکلي: «د افغانستان اتباع یا ملتونه باید د پاکستاني پوځ الوتکو، د بمبارۍ او د بې ګناه خلکو د بمبارۍ په اړه نړیوالو ادارو ته شکایت وکړي.»
امین منګل لیکلي : «لږ صبر وکړه، إن شاء الله ډېر ژر به داسې انتقام واخلو چې دا خاوره به یې هېر نه کړي، ځکه چې پر دې خاوره ډېرو کفارو سرونه خوړلي دي.»
شبیراحمد لیکلي: «دا خلک نه سمیږي او هر ځل د افغانستان د هوایي حریم د نقض ترڅنګ بیګناه وګړي شهیدانوي، نو همدا یی وخت دی چې افغانان دې د یرغلګر دښمن په مقابل کې ملي قیام وکړي او داسې درس دې ورکړل شي چې نسلونه یې د افغانستان پر خاوره د یرغل جرات ونه کړي.»
ډېرو نورو کسانو هم پر ټولنیزو پانو ورته څرګندونې کړي دي.
طالبانو هم پر افغانستان د پاکستان د تېرې شپې بریدونه غندلي او ویلي یې دي چې د خپل هوايي او ځمکني حريم او خلکو دفاع خپل شرعي حق بولي او په مناسب وخت کې به لازم ځواب ورکړي.
ياد بريدونه د افغانستان پخواني ولسمشر حامد کرزي، په پاکستان کې د افغانستان پخواني سفیر ملا عبدالسلام ضعیف، د سولې عالي شورا پخواني مشر ډاکټر عبدالله او ځینو نورو سیاسیونو هم په سختو ټکو غندلي دي.
د بشري حقونو نړیوال بنسټ (IHR) هم د پاکستان د پوځي رژیم د یاد برید په اړه ویلي، پر هغو سیمو بریدونه چې ملکي خلک پکې مېشت دي او د ډېرې مرګژوبلې لامل ګرځي، له نړیوالو حقونو د قانون او بشردوستانه اصولو جدي سرغړونه بلل کېږي.
دغه بنسټ، د دغه برید د سملاسي، رڼې او خپلواکه څېړنې او په ښکاره د عدالت منګولو ته یې د عاملینو د سپارلو غوښتنه ګړې ده.
Views: 9
