د مالیې وزارت وایي چې د ریاستالوزرا د اقتصادي معاونیت د هدایت پر اساس، له راتلونکو درېیو میاشتو وروسته له پاکستانه واردېدونکي درمل نه محصولوي.
د مالیې وزارت نن په یوه اعلامیه کې لیکلي، د ریاستالوزرا اقتصادي معاونیت د هدایت پر بسټ د مالیې وزارت له راتلونکو درېیو میاشتو وروسته له پاکستانه را واردېدونکي درمل نه محصولوي.
اعلامیه کې راغلي، په دې توګه له پاکستانه د درملو ټولو واردوونکو ته خبر ورکول کېږي چې تر یادې نېټې پورې خپلې اړوندې سوداګریزې معاملې تصفیه کړي او په جدي ډول دې له بدیلو لارو کار واخلي.
سرچینې زیاته کړې، افغانستان دغه پرېکړه هېواد ته د ټیټ کیفیت درملو له را واردېدو د مخنیوي په موخه کړې ده او سوداګر باید د بدیلو لارو او د لوړ کیفیت درملو پر را واردولو تمرکز وکړي.
د سرچینې د معلوماتو له مخې، دغه وزارت د هېواد په ټولو ګمرکونو کې د کورنیو او بهرنیو سوداګرو لپاره د پام وړ اسانتیاوې برابرې کړې دي او له بدیلو لارو د لوړ کیفیت درملو د را واردولو برخه کې به هم لا زیاتې اسانتیاوې برابرې کړي.
دا په داسې حال کې ده، پرون د ریاستالوزرا اقتصادي مرستیال له صنعتکارانو او سوداګرو وغوښتل چې د پاکستان پر ځای دې له نورو لارو سوداګرۍ ته مخه کړي او که دغه کار ونه کړي نو د ستونزو رامنځته کېدو په صورت کې یې ا.ا ستونزو ته رسېدنه نه کوي.
هغه وویل: «په دې کې هيڅ شک نشته چې زموږ د صحي سکټور اساسي ستونزه او د په کلني ډول د سلګونه میلیون ډالرو د وتلو اصلي علت له پاکستانه د بېکیفیته دوا ورود دی. له پاکستانه د دوا له واردوونکو په ټيڼګار غواړم چې خپل واردات مو له نورو هېوادونو او نورو لارو ترسره او ژر تر ژره له بدیلو لارو استفاده وکړئ.»
Views: 6
