دایکنډي کې سیمهییزې سرچینې وايي چې د دغه ولایت پنځو اوسېدونکو تاجکستان کې د ډبرو سکرو یوه کان کې د چاودنې له امله ژوند له لاسه ورکړی دی.
د دایکندي د طبیعي پېښو پر وړاندې د چمتووالي ریاست یوه خبرپاڼه کې ویلي، د دغه ولایت پنځه اوسېدونکي چې په تاجکستان کې یې د ډبرو سکرو یوه کان کې کار کاوه، دوه ورځې مخکې په کان کې دننه د ګاز چاودنې وژلي دي.
د دې پېښې قربانيان د دايکنډي د شهرستان، ميرامور او اشترلي ولسواليو اوسېدونکي وو.
په همدې حال کې، ځینو رسنیو راپور ورکړی چې په تاجکستان کې د ډبرو سکرو یوه کان کې شپږ افغان کارګرو ژوند له لاسه ورکړی چې پنځه یې د دایکنډي او یو بل د غور ولایت اوسېدونکي دي.
دا په داسې حال کې ده چې څه موده مخکې هم د دایکنډي نهو اوسېدونکو په تاجکستان کې د ډبرو سکرو یوه کان کې د ګازنیونې له امله ژوند له لاسه ورکړی و.
Views: 7
