بدخشان کې ځايي چارواکي وایي چې د تېرې شپې زلزلې له امله د دغه ولایت په شهر بزرګ ولسوالۍ کې هم شاوخوا ۸۰۰ کورونه بشپړ یا یو څه نړېدلي دي.
د بدخشان د طبيعي پېښو پر وړاندې د مبارزې ادارې رییس مولوي محمداکرم اکبري وویل: «نن سهار د تېرې شپې له زلزلې وروسته ټکانونو د بدخشان د شهرِ بزرګ ولسوالۍ اوسېدونکي زیانمن کړي دي.»
نوموړي زیاته کړه، تر ټولو ډېر مالي زیان د دې ولسوالۍ د «چوګاني» کلي او شاوخوا سیمو اوسېدونکو ته اوښتی او استول شوي ټیمونه د وضعیت د څېړنې په حال کې دي.
بلخوا، د شهرِ بزرګ ولسوال مولوي عبدالرشید رشاد وایي چې په دې ولسوالۍ کې شاوخوا ۸۰۰ کورونه د تېرې شپې زلزلې او له هغې وروسته د څه باندې شپږو ټکانونو له امله په بشپړ یا جزوي ډول ویجاړ شوي، ځایي اوسېدونکي اندېښمن دي او د وېرې له امله له خپلو کورونو بهر ازادې فضا ته وتلي دي.
د هغه په وینا، د زیانونو د ارزونې لپاره ګډ پلاوي چې د سره صلیب، غیردولتي بنسټونو او د طبيعي پېښو پر وړاندې د مبارزې ادارې استازي پهکې شامل دي، سیمې ته استول شوي دي.
Views: 2
