یو شمېر سوداګر او موټرچلوونکي وايي، لسمه ورځ ده چې د خوست د غلامخان لار د پاکستاني له لوري د سوداګرۍ پر مخ تړلې او باروړونکو موټرو ته پرې د تګ راتګ اجازه نه ورکول کېږي.
د خوست غلامخان او پر فرضي کرښه نورې سوداګریزې لارې وروسته له هغه د پاکستاني لوري وتړل شوې چې افغان دفاعي ځواکونو د یادې کرښې په اوږدو کې پر پاکستاني پوځي تاسیساتو انتقامي بریدونه وکړل او نن یې لسمه ورځ ده چې دا لارې د هر ډول ټک راتګ پر مخ ټرلې دي.
سوداګر او موټرچلوونکي وايي، دا مهال د کرښې دغې غاړې ته پر تازه مېوې او سبزۍ بار سلګونه موټر ولاړ دي او پاکستانی لوری د اوښتو اجازه نه ورکوي.
يوه موټرچلوونکي نيازمين پژواک ته وويل: «د پکتيکا له ښرنې مې موټر رابار کړی او نن لسمه ورځ ده دلته ولاړ يم. مالونه مو ټول خراب شول، له ګاډو مو وغورځول، د ورځې د میلیونونو پيسو تاوان دی. اوس خو اوربند وشو نو په کار ده چې لارې بېرته خلاصې شي.»
يوه بل موټرچلوونکي محمدقديم وويل: «دې ډکو ډکو لاريو کې ټول مالونه خراب شوي، دا له مڼو بار موټر کې ټولې مڼې خرابې دي، اوبه ترې بهېږي، موږ څه وکړو، وس مو نشته، خو اوس دواړو حکومتونو ته سوال کوو چې د سبزۍ دې بار موټرو ته د تګ اجازه ورکړي، خلکو ته سخت تکليف دی.»
په همدې حال کې سوداګر وايي چې پر دې لار هره ورځ سلګونه باروړونکي موټر تګ راتګ کوي چې له تړل کېدو سره يې سوداګرو ته ميليونونه افغانۍ مالي زيان رسېږي.
د خوست د سوداګري او صنايعو خونې مشر نواب اميرزي په دې اړه پژواک ته وويل: «په دې لار هره ورځ شاوخوا پنځه سوه موټر تګ راتګ کوي، په دې کې زياتره ژر خرابېدونکي مالونه وي، بدبختي په دې کې ده چې کله زموږ موسمي سبزيجات او مېوهجات ورسېږي، پاکستان بدون له دې که جنګ وي او که نه وي، په يو طرفه ډول د نړۍوالو ترانزيټي قوانينو خلاف دا لار بندوي.»
ورته مهال، د خوست د والي وياند مستغفر ګربز پژواک ته وويل، دوی د ګاونډيتوب اصل ته ژمن دي او هڅه يې دا ده چې په دغه ولايت کې سوداګرو ته لازمې اسانتياوې رامنځته کړي.
هغه زیاته کړه: «افغانستان له ټولو ګاونډيو هېوادونو سره ښې اړيکې غواړي، دا يې پاليسي نه ده چې چا سره لارې وتړي او يا تجارت په سياست کې ور داخل کړي. انشاالله چې دوی په دې هڅه کې دي چې د تجاراتو لپاره لازمې اسانتياوې رامنځته کړي.»
دا په داسې حال کې د افغانستان او پاکستان ترمنځ له څو ورځنیو ترینګلتیاوو وروسته، د روانې اونۍ یکشنبې په ورځ په دوحه کې د قطر او ترکیې په منځګړیتوب د افغانستان او پاکستان استازو ترمنځ د مذاکراتو په لړ کې دواړه هېوادونه پر «بشپړ او معنا لرونکي اوربند» هوکړې ته ورسېدل.
د یادونې ده، نن د پاکستان يو لوړپوړی پلاوی هېواد ته راځي چې د نورو مسايلو ترڅنګ به د دوه اړخيزې سوداګرۍ په اړه هم له افغان چارواکو سره خبرې وکړي.
Views: 8
