ځینې کسان وایي چې د طالبانو بېلابېلې ډلې پر خپل سر له دوی څخه عُشر ټولوي او داسې هم شوي دي چې په یوه کال کې دوه ځلې عُشر ورکړی؛ غوښتنه کوي چې طالبان دې د عُشر ټولولو لپاره د ښو اخلاقو خاوندان وګماري او د یوه ځانګړي طرزالعمل له مخې دې ټول کړي.
عُشر یو اسلامي مالي فریضه ده چې د کرنیزو حاصلاتو (غنم، اوربشې، مېوې، انګور، خرما او نور) څخه ورکول کېږي. دا د زکات یوه ځانګړې برخه ده، خو توپیر یې دا دی چې زکات د شتمنۍ څخه ورکول کېږي، خو عُشر د حاصلاتو څخه.
د پروان ولایت د بګرام ولسوالۍ یو تن اوسېدونکي، حسین احمد، وایي سږ کال یې دوه ځلې عُشر ورکړی دی.
هغه زیاتوي چې یو وار یې عُشر په خپله اړمنو کسانو ته ورکړی او دویم وار یې هغو طالب جنګیالیو ته ورکړی چې په وار-وار به یې د کور دروازې تر شا ورتلل.
دی وایي: «پر موټرسایکل سپاره کسان راشي چې موږ ولسوالۍ را لېږلي یو؛ نور یې موږ ته هم حال نه کوي؛ مجبور یو، څه چې وایي هغه به منو.»
حسین احمد وایي هر څوک ځان طالب معرفي کوي، خو طالبان باید خپل استازي د کلي ملکانو ته معرفي کړي ترڅو خلک یې وپېژني.
د یادې سیمې یو بل اوسېدونکی، حاجي غفران، هم وایي چې عُشر د اړمنو کسانو حق دی او د مال خاوند باید هغه پر خپله خوښه اړمنو کسانو ته وسپاري.
هغه زیاتوي: «طالبان اوس یې په زور ټولوي، او باید یوازې طالبانو ته یې ورکړې؛ که ورنه کړې، بیا درسره عقده نیسي، وهل او ټکول هم کوي؛ او که ورکړې، زړه به دې صبر نه وي ځکه چې دا د زور کار دی.»
دی وایي چې څو ځله داسې هم شوي چې څو څو ډلې د عُشر په نوم راغلي او خلک نه پوهېږي چې اصلي کسان څوک دي.
د کابل ولایت د سبز ولسوالۍ یو تن اوسېدونکی، محمد تقي، هم وایي چې د دې لپاره باید یوه ځانګړی طرزالعمل جوړ شي او د هغې له مخې عُشر ټول شي.
دی وایي چې د عُشر ټولولو لپاره باید داسې کسان وګمارل شي چې له خلکو سره سم چلند وکړي، قناعت ورکړي او ډاډ ورکړي چې پیسې بیتالمال ته تسلیمېږي.
هغه دغهراز وایي چې اوس مهال طالب جنګیالي پرته له دې چې چا ته رسید ورکړي یا کومه پارچه وښيي، عُشر ټولوي چې دا بېاعتمادي رامنځته کوي او باید دا د یوې سمې لارې له مخې ټول شي.
طالبانو تراوسه په دې اړه څه نه دي ویلي، خو پر دې یې ټینګار کړی چې عُشر باید دوی ته ورکړل شي
Views: 5
