د افغانستان د ازادو سیالیو ورزشکار احمدولي هوتک د اتلولۍ کمربند ترلاسه کولو لپاره له خپل روسي سیال سره لوبه ترسره کوي او د دې سیالۍ د ترسره کولو لپاره نن سهار (یکشنبه) مسکو ته روان شو.
احمدولي هوتک پر خپله فېسبوکپاڼه په کابل هوايي ډګر کې د خپل انځور په خپرولو لیکلي: «له هوايي ډګره د سیالۍ تر ډګره، یوه موخه لرم؛ د افغانستان لپاره بریا.»
هغه هیله څرګنده کړې چې د افغانستان نوم به يو ځل بیا لوړ کړي.
د یادونې ده، احمدولي هوتک به د روان کال د لړم په لومړۍ نېټه د بیلاروس په مینسک ښار کې په ۷۰ کیلوګرام وزن کې میدان ته کوزېږي.
هغه د WTKF سازمان د اتلولۍ کمربند لپاره د روسیې له ارسن پارکخوګاجیف سره مسابقه ترسره کوي.
هوتک تر دې دمه په ۱۲ مسلکي سیالیو کې ګډون کړی چې ۱۱ بریاوې او یوه ماته لري.
Views: 1
