د روغتیا نړۍوال سازمان اعلان کړی چې د شري ناروغۍ واکسین د تطبیق کمپاین لومړی پړاو په بریالیتوب پای ته ورسېد او د افغانستان په ۱۷ ولایتونو کې له شپږ میاشتیني تر ۱۰ کلنۍ پورې نږدې ۸.۹ میلیون ماشومان د دې ناروغۍ پر وړاندې واکسین شوي دي.
یاد سازمان د یوې خبرپاڼې په خپرولو ویلي چې د روغتیا نړۍوال سازمان (WHO) او د ملګرو ملتونو د ماشومانو د ملاتړ صندوق (UNICEF) د افغانستان د خوندیتوب پراختیا ملي پروګرام (NEPI) په همکارۍ د شري واکسین کمپاین لومړی پړاو په بریالیتوب پای ته ورساوه.
خبرپاڼه کې ویل شوي چې د یاد کمپاین په لومړي پړاو کې د هېواد په سړو ولایتونو کې له شپږ میاشتیني تر لس کلنۍ شاوخوا ۸.۹ میلیون ماشومان واکسین شول.
د روغتیا نړۍوال سازمان په خبرپاڼه کې راغلي، یاد کمپاین چې په دوو پړاوونو کې ترسره کېږي، داسې طرحه شوی چې د ۶ میاشتیني تر ۱۰ کلنو ماشومانو کې ۹۵ سلنه پوښښ تامین کړي او دغهراز هغه ماشومان چې مخکې یې واکسین نهدی ترلاسه کړی، وپېژني او واکسین یې کړي.
یاد سازمان ویلي: «په ۲۰۲۴ کال کې د شري پر ناروغۍ د څه باندې ۹۳۰۰ اخته کسانو راپور ثبت شوی. د ۲۰۲۵ کال تر اګسټ میاشتې پورې ۸۵۰۰ نورې پېښې هم ثبت شوې. د خپرېدو پېښې هم ډېرې شوې او ۲۰۲۳ کال کې له ۱۲۷ پېښو په ۲۰۲۴ کال کې ۴۳۰ پېښو ته رسېدلې. نږدې ۹۲ سلنه پېښې یې له ۱۰ کلنو کمعمره ماشومانو کې ثبت شوې دي.»
د خبرپاڼې د معلوماتو له مخې، د یاد کمپاین له پیله مخکې یوازې ۵۵ سلنه ماشومانو د شري ناروغۍ لومړی او یوازې ۴۴ سلنه ماشومانو دویم دوز واکسین ترلاسه کړی و. د واکسیناسیون په پوښښ کې دغه خلاوې ډېری ماشومان له خونديتوبه لرې کړي وو او د ناروغۍ خپرېدو زمینه یې برابره کړې وه.
د روغتیا نړۍوال سازمان وايي، افغانستان د شري ناروغۍ د له منځه وړلو ته ژمن دی. د دې موخې ترلاسه کولو لپاره د خوندیتوب لوړ پوښښ او د واکسیناسیون هڅې، له ټولنو ساتنه او په هېواد کې دننه او سرحدي سیمو کې د ناروغۍ د بیاخپرېدو مخنیوی حیاتي دی.
افغانستان کې د روغتیا نړۍوال سازمان استازي ادوین سنیزا سالوادور ویلي: «شری یوه وژونکې خو د مخنیوي وړ ناروغي ده او د افغانستان په څېر هېواد کې چې ګڼ شمېر ماشومان پکې له خطر سره مخ دي، د واکسین تطبیق د ژغورنې یوازېنۍ لار بلل کېږي.»
نوموړي زیاته کړه: «د دغه ملي کمپاین د لومړي پړاو په بریالۍ توګه بشپړېدل له ناروغۍ، معلولیت او مړینو څخه د میلیونونو ماشومانو خوندیتوب لپاره یو مهم ګام دی. موږ د هغو روغتیایي کارکوونکو، رضاکارانو او همکارانو له نه ستړېکېدونکو هڅو ډېره مننه کوو چې دغه کار یې په سختو شرایطو کې ممکن کړ. د روغتیا نړۍوال سازمان به د افغانستان له روغتیایي سیسټمه خپل پیاوړي ملاتړ ته دوام ورکړي څو هيڅ ماشوم له روغتیایي خدمتونو بېبرخې پاتې نه شي.»
دغهراز، افغانستان کې د یونیسف استازي ډاکټر تاجالدین اویواله ویلي: «هیڅ افغان ماشوم باید د داسې ناروغۍ له امله خپل ژوند له لاسه ور نکړي چې موږ یې په مخنیوئ پوهېږو. شری نه یوازې یوه وژونکې ناروغي ده بلکې د واکسین پوښښ او روغتیایي عدالت د تشو یو خبرداری هم دی. دغه ناروغي چې په هره سیمه کې ډېره وي، دا ښيي چې د هماغو سیمو ماشومان له پامه غورځول شوي دي.»
هغه زیاته کړه، د شري ناروغۍ پر وړاندې د واکسین ملي کمپاین د لومړي پړاو بریا یو مهم پرمختګ دی خو اوس باید تمرکز د خوندیتوب سیسټم د تشو په ډکولو او د منظمو واکسینونو پر ترسره کولو وي. د پیاوړو سیسټمونو، مساوي لاسرسي او کلکې ارادې له لارې کولای شو هر ماشوم د شري په څېر د مخنیوي وړ ناروغیو څخه وژغورو.
Views: 1
