د پژواک بنسټ له لوري د هېواد د وتلي سیاسي، فرهنګي او ادبي شخصیت عبدالرحمن پژواک د “ملي افکارو او ټولنیزو ارمانونو” په اړه علمي سیمینار جوړ شو.
دغه سیمینار چې د زوم له لارې ترسره شو، په کې د هېواد وتلي فرهنګي شخصیتونو د عبدالرحمن پژواک پر ژوند، شخصیت، اثارو، فرهنګي خدمتونو او په ځانګړې توګه د هغه پر ملي افکارو او ټولنیزو ارمانونو مقالې ولوستلې.
د هغه لمسی او د پژواک بنسټ مشر فرهاد پژواک په خپلې پرانستونکې وینا کې هیله څرګنده کړه چې دغه اقدام د دا ډول بحثونو د پیل لړۍ ثابت شي، څو خلک په علمي او ادبي مسایلو باندې خبرې وکړي او د استاد پژواک پر څرګندونو بحثونه وشي.
نوموړي وویل، استاد پژواک ډېره مهال له هېواده بهر پاتې شو، ځکه په بهر کې د هغه له افکارو او نظرونو څخه خلکو ډېره ګټه پورته کړه، خو په هېواد کې ددنه خلک ترې بې برخې پاتې شول.
فرهاد پژواک زیاته کړه: «زه غواړم چې د پژواک اثار د افغانستان نورو نسلونو ته ورسوم، چاپ یې کړم، څو خلکو ته د استاد پژواک د هیوادنۍ مینې، خپلواکۍ او پرمختګ نظرونه ورسیږي.»
د هغه په وینا، استاد پژواک تل ویل، افغانستان یو خپلواک هېواد دی، خو د حقونو په برخه کې افغانان بندیان دي او دغه کار استاد پژواک ځوراوه، تل یې د ټولو خلکو، ښځو ، سړیو او ماشومانو پر ازادۍ ټینګار کاوه.
د پژواک بنسټ مشر وایي: «د هغه اثار د افغانستان د ملي میراث برخه ده، موږ غواړو د هغه دا امانت د افغانستان ځوان نسل ته ورسوو. څو ځوان نسل د استاد پژواک له افکارو سره اشنا شي؛ خو دا کار یواځې زه نه شم کولی، نور پوهان، لیکوالان او عالمان په دې برخه کې باید همکاري وکړي.»
فرهاد پژواک ټولو ته بلنه ورکړه، چې په دې برخه کې ورسره مرسته او همکاري وکړي څو د استاد پژواک پاتې اثار د هېواد په دواړو ملي ژبو چاپ او خپاره شي.
د افغانستان د علومو اکاډمۍ پخواني غړي او په ایران کې د جمهوري حکومت وروستي سفیر دوکتور عبدالغفور لېوال په دې سیمینار کې د استاد پژواک پر ملي افکارو خبرې وکړې او خپله مقاله یې واوروله.
لېوال وایي، د استاد پژواک په اثارو کې د هغه د ملي مفکوري، ملت پالنې او وطن دوستۍ انعکاس له ورایه ښکاري.
د هغه په وینا، افغانستان لپاره شلمه پیړۍ د نوي فرهنګي دوران د پیل لپاره ډېره مهمه ده، د عصري زده کړو پیل، ټیکنالوجۍ راوستل، د نوي ادبي بهیر پیل و، د دې سرچینه او لومړۍ ریښه یې مشروطه غوښتونکو افکارو پورې رسېږي او دا کار د ملت جوړونې په پروسه کې مرسته وکړه.
عبدالغفور لېوال وایي، د افغانستان د دویم نسل له سر لارو څخه یو استاد پژواک و، ځکه د هغه افکار پر ملي ارزښتونو ولاړ و.
ده زیاته کړه، د استاد پژواک افکار د افغانانو لپاره د یو نوي معاصر ژوند او پرمختللی افغانستان هڅه وه، هغه د دې سخت تږی و، چې افغانان پرمختللی ژوند ولري، هغه افغانانو ته د نړۍ د ټولو هوساینو غوښتنه کوله.
لېوال وویل، د استاد پژواک د یو دیپلومات په توګه پرمختللې نړۍ یې لیدلې وه او غوښتل یې خپل ولس ته هم پرمختګ ورکړي.
د هغه په وینا، په ملي کچه د افغانستان له ټولو پوهانو او نخبه ګانو سره یې ښې اړیکې او راشه درشه یې ورسره درلوده.
دی وایي، استاد پژواک د افغانستان له لومړنیو هغو شاعرانو څخه دی چې له خپلو ملي ویاړونو خبر دی او هغه یې په خپلو شعرونو کې ځای کړی دی. د افغانستان عظمت یې په ادبیاتو کې را ژوندی کړی دی.
د لېوال په وینا، د وطن پالنې او وطن دوستۍ مفکوره د هغه په اشعارو کې له ورایه ښکاري. د استاد وطن پالونکي شنونه یواځې شعرونه نه دي، د هغه نورو اثارو کې هم لیدل کېږي.
د افغانستان یو تن پخوانی دیپلومات احسان لمر د استاد عبدالرحمن پژواک پر هغه فکر خبرې وکړې چې د بشري حقونو او بشري ازادۍ په اړه یې درلود.
لمر وايي استاد پژواک د دې وطن( افغانستان) عاشق و، ځکه یې مخالفینو له هېواده وویستلو او له هېواده بهر یې پاتې کړو، ګنې د نورو هغو وطن دوستانو په څیر چې په هېواد کې پاتې و، چې یا به شهید شو او یا زنداني شو.
ټاکل شوې وه، چې هغه د ملګرو ملتونو سرمنشي شي، خو د وخت حکومت یې مخه ونیوله او مخالفت یې وکړ.
هغه یو عادي انسان و، هغه نړېوال فکر درلود. د هغه نوم د نړۍ د سترو دیپلوماتانو او شخصیتونو کې شمیرل کېده.
د کابل پوهنتون پخوانی استاد نصر الله ستانکزي د عبدالرحمن پژواک پر دیپلوماتیک او سیاسي ژوند رڼا واچوله او و یې ویل چې هغه د ملګرو متلونو د عمومي مجمعې په کچه مطرح شخصیت و، د ملګرو ملتونو په عمومي غونډو کې یې د افغانستان استازیتوب کاوه، د اسلامي نړۍ هېوادونو په کنفرانس او د ناپییلونو هېوادونو په غونډو کې ګډون او پر خپلواکۍ او حق خود ارادیت غوښتنه یې کوله.
د هغه په وینا، استاد پژواک د سردار داوود خان له سیاستونو سره موافق و. کله چې داوود خان د پښتونستان موضوع مطرح کړه، استاد پژواک وویل چې ولس ته باید دوه انتخابه ورکړل شي، یو دا چې مستقل هېواد جوړ شي او یا له افغانستان سره یو ځای شي.
ستانکزی وایي، خو د استاد پژواک دریځ داو، چې پښتونستان له افغانستان سره یو ځای شي او د وخت حکومت ته یې دا توصیه کوله، چې د عدالت اجتماعی پلي کېدو سره هغوی له افغانستان سره یو ځای کېدای شي.
دغه راز د ښځو د حقوقو په اړه د استاد پژواک د افکارو په اړه د ښځو فعالې دوکتور عالمې خبرې وکړې او خپله مقاله یې واوروله.
په دې علمي سیمینار کې له افغانستان پرته له بېلا بېلو اروپایي هېوادونو، امریکا او کاناډا څخه د افغانستان پخوانیو دیپلوماتانو، د پوهنتون استادانو، د بشري حقوقو او ښځو حقوقو فعالانو، ژورنالستانو، لیکوالانو، محققینو او علماوو برخه اخیستې وه.
د سیمینار په پای کې د ګډونوالو لخوا سوالونه مطرح شول چې د ویناوالو لخوا یې ځوابونه ورکړل شول.
Views: 111
