د کاناډا په اونټاريو ولايت کې مېشتو افغانانو د افغانستان د ملت د بابا او پخواني پاچا اعلیحضرت محمد ظاهرشاه د زوی میرویس ظاهر او د افغانستان په هرات ولايت کې د ورستیو زلزلو له امله د شهیدانو روح ته دعا او د قرانکریم ختم وکړ.
ياد مراسم د ۲۰۲۳ میلادی کال د اکتوبر میاشتې په ۹مه نېټه د کاناډا، اونټاریو ولايت د هملتون ښار د حضرت ابراهیم خليل الله په جامع جومات کې ترسره کړل چې په سلګونو افغانانو په کې ګډون کړی و.
د مراسمو په پيل کې د ګډونوالو له خوا د قرانکریم ختم وشو او د شهزاده میرویس ظاهر او د هرات، بادغېس او فراه د غمیزې شهیدانو روح ته یې دعا وکړه. د غونډې ګډونوالو د اعلیحضرت محمد ظاهر شاه د شخصیت، هېوادپالنې مهربانۍ او ځیرکتیا په اړه خبرې وکړې او د ملت د بابا اعلیحضرت محمد ظاهر شاه دوره یې د هېواد د تاریخ یوه ځلانده دوره وبلله او د غونډې ګډونوالو د هغه مهربانه او زړه سواند پاچا د کشر زوی شهزاده میرویس ظاهر په مړینه خواشیني څرګنده کړه.
د غونډې ګډونوالو او ویناوالو پخوانی پاچا د ملی وحدت سمبول یاد کړ او غوښتنه یې وکړه چې د هېواد واکداران او نوی نسل بايد په هېواد کې د ملي يووالي او سولې لپاره د هوښیار پاچا تګلارې او کړنې ولولي او په لاره يې قدم واخلي چې افغانستان بیرته د نړۍ او سيمې په کچه د برم او عزت څښتن شي.
د غونډې ګډونوالو په هرات ولایت کې د زلزلې له امله د هېوادوالو په شهادت او دوی ته په اوښتو زیانونو ژوره خواشیني څرګنده کړه او د لوی خدای (ج) له درباره يې شهیدانو ته د فردوس جنت او ټپیانو ته د عاجلې روغتیا د غوښتلو تر څنګ وویل چې له خپلو غم ځپلو هېوادوالو سره هر ډول مرستې ته تیار دي. ویناوالو په نړیواله ټولنه او نړیوالو بشرپالو سازمانونو هم غږ وکړ چې له زلزله ځپلو افغانانو سره مرستې وکړي.
په ټورنټو ښار کې مېشت لیکوال او فرهنګي شخصیت محمد باهر فورمولي په خپلو خبرو کې وویل چې محمد ظاهر شاه د هېواد یو نه تکرارېدونکی زعیم او مشر و، اعليحضرت افغانستان او افغانان یو موټی وساتل او په خپله هوښیارتیا او ناپېیلي سیاست سره یې افغانستان له هر ډول نیابتي جګړو او د ګاونډیو له لاسوهنو وساته.
نوموړي زياته کړه:«سره له دې چې افغانان بېوزله وو خو بيا هم په سیمه او نړۍ کې د عزت څښتن، په خپلو وسایلو بسیا او یو موټی وو». فورمولي د ملت بابا اعلیحضرت محمد ظاهرشاه یو هوښیار ملي وحدت ته ژمن، باعزته او مهربان شخص یاد کړ او د هغه د زوی اعلیحضرت میرویس ظاهر په مړینه یې ژوره خواشینې څرګنده کړه.
ورپسې په کاناډا کې د افغانستان پخوانۍ سفیرې او د ولسي جرګې پخوانۍ وکیلې شینکۍ کړوخېل د ښځو حقونو، پوهنې او سیاسي مشارکت کې د ګډون په اړه د هېواد د پخواني پاچا د سلطنت دوره له لاسته راوړنو ډکه وبلله او پخوانی پاچا یې د ښځو حقونو ته ژمن، مهربان او زړه سواند مشر یاد کړ.
په دې مراسمو کې د ولسې جرګې پخواني مرستیال محمد نذیر احمدزی هم خبرې وکړې، نوموړي په هرات، فراه او بادغېس ولايتونو کې د وروستۍ زلزلې له کبله د اوښتو ځاني او مالي زیانونو او د شاهزاده میرویس ظاهر په مړینه خواشیني څرګنده کړه. احمدزی، د پاچا د سلطنت دوره د قانون جوړونې او ملي وحدت ځلانده دوره وبلله.
هغه پر ټولو هېوادوالو غږ وکړ چې باید په تېرو تېروتنو اعتراف، له ځان غوښتلو او شخصي ګټو تېر او د ملي يووالي د پیاوړتیا لپاره کار وکړي. احمدزي پر ټولو افغانانو غږ وکړ چې له غم ځپلو هېوادوالو سره له هر ډول مرستو ځان ونه سپموي او په پوره اخلاص سره مرستې وکړي.
ورپسې د کندوز پخواني والي عبدالجبار نعیمي خبرې وکړې د ملت د بابا او د افغانستان د پخواني پاچا د شخصیت، وطنپالنې هېواد او خلکو ته په ترسره کړو خدمتونو يې رڼا واچوله او پر ټولو افغانانو یې غږ وکړ چې د پردیو او افغانستان دښمنه دسیسو ښکار نه شي خپل ملي یووالی وساتي او د ملت د بابا لاره تعقیب کړي.
نعیمي د شاهزاده میرویس ظاهر او هرات ولایت کې د زلزلې له امله د شهیدانو پر مړینه ژوره خواشیني څرګنده او هېوادوال یې له مصیبت ځپلو هېوادوالو سره مرستو ته را وبلل.
نعیمی ډاډ ورکړ چې ټول افغانان په ځانګړي توګه بهر مېشته افغانان به د خپلو مصیبت ځپلو هېوادوالو تر څنګ ودرېږي او ډاد یې ورکړ چې دوی یوازې نه دي او ټول هېوادوال یی تر څنګ ولاړ دي نوموړي له نړیوالې ټولنې هم وغوښتل چې په دغه سختو شرایطو کې افغانان هېر نکړي او له ناورین ځپلو افغانانو سره مرستې وکړي.
غوڼده د هملتون ښار د حضرت ابراهیم خليل الله مسجد د مشر سید خسرو هاشمي په وینا او خوږ ژبي قاري حاجي صاحب حمید الله احمدزي په تلاوت او دعا پای ته ورسېده
Views: 296
