په زلزلهځپلو سيمو کې نن هم د ژغورنې عملیات روان و؛ د کونړ په زلزله کې تردې دمه د شهیدانو شمېر ۲۲۰۵ او د ټپیانو شمېر ۳۶۴۰ کسانو ته لوړ شوی دی.
د روانې اونۍ د دوشنبې په شپه شاوخوا ۱۲ بجې د ريښتر په کچه ٦ درجې زلزلې د افغانستان کونړ، ننګرهار، لغمان، پنجشېر او نورستان ولایتونو کې زیانونه واړول.
زلزلې ډېر زیان په کونړ کې اړولی دی.
د طالبان مرستیال ویاند حمدالله فطرت نن پر خپله اېکسپاڼه لیکلي: «د کونړ په نورګل ولسوالۍ مزار درې د څوکۍ ولسوالۍ ډيوه ګل درې، چپې درې، او ماڼوګي ولسوالۍ په زلزله ځپلو ساحو کې تر دې دمه په ويجاړو شويو کورونو کي د پلټنې او ژغورنې په عملياتو کې د سلګونو شهيدانو جسدونه را ايستل شوي چې له دې سره د ټولو شهيدانو شمېر ۲۲۰۵ ته او د زخميانو ۳۶۴۰ ته پورته شوی».
هغه زیاتوي، د ژغورنې او پلټنې هڅې لا هم دوام لري، په بېلابېلو سيمو کي خلکو ته خيمې وهل شوې او د لومړنيو او عاجلو مرستو لېږد په منظم ډول روان دی.
Views: 10
