د افغانستان کرکټ ملي لوبډلې په درې اړخیزه سیالیو کې خپله لومړی شل اوریزه لوبه پاکستان ته وبایلله.
نننې لوبه چې د شارجه کرکټ لوبغالي کې ترسره شوه، پچه یې د پاکستان لوبډلې وګټله او لومړی یې توپوهنه ترسره کړه.
په دغه لوبه کې پاکستان په ټاکل شوو شل اورونو کې د ۷ لوبغاړو په سوځېدو سره ۱۸۲ منډې وکړې.
په یاده لوبه کې فرید ملک دوه، راشد خان، محمد نبي، عظمت الله عمرزي او مجیب الرحمن د پاکستان یو – یو لوبغاړي وسوځول.
افغان لوبډلې ورکړل شوې هدف پوره نه کړای شو او په شلم اور کې د ټولو لوبغاړو په سوځېدو سره یې ۱۴۳ منډې وکړې او د ۳۹ منډو په توپیر یې پاکستان ته لوبه وبایلله.
د افغانستان له لوري په توپوهنه کې راشد خان ۳۹، رحمان الله ګربز ۳۸، صدیق اتل ۲۳ او دروېش رسولي ۲۱ منډې وکړې.
د یادونې ده، افغان کرکټ ملي لوبډله به په درې اړخیزه سیالیو کې خپله دویمه لوبه د سپټمبر په لومړی د متحده عربي اماراتو له لوبډلې سره ترسره کړي.
Views: 8
