د لوګر د ازرې ولسوالۍ یو شمېر اوسېدونکي وایي چې تېره ورځ او شپه د د سخت ورښت له امله په دغه ولسوالۍ کې سېلابونه راوتلي چې د مالي زیانونو ترڅنګ یې درېیو کسانو ته مرګژوبله هم اړولې ده.
د ازرې ولسوالۍ یوه اوسېدونکي جمعهګل پژواک خبري اژانس ته وویل چې د تېرې شپې او ورځې سېلابونو د دې ولسوالۍ په برې چوترې سیمه کې د یوه ځوان ژوند اخیستی او په اکبرخېلو سیمه کې یې دوه تنکي ځوانان ټپیان کړي دي.
هغه زیاته کړه چې دوه کسان د ولسي وګړو په مرسته له سېلاب ژغورل شوي دي.
د ازرې ولسوالۍ بل اوسېدونکي وليخان وویل چې د سېلاب له امله ګڼ شمیر استوګنیز کورونه، جوماتونه، لویې لارې او پلونه ویجاړ او سلګونه جریبه کرنیزې ځمکې او فصلونه لهمنځه تللي دي.
هغه له حکومته وغوښتل چې د ازرې ولسوالۍ له سېلابځپلو کورنیو سره بېړنې مرستې وکړي.
بلخوا، د لوګر د والي ویاند صدیقاحمد صدیقي هم تاییدوي چې تېره ورځ او شپه د سختو وروښتونو له امله سېلابونو په ازره ولسوالۍ کې خلکو ته درانه زیانونه اړولي دي.
صدیقي زیاته کړه چې په دغه ولسوالۍ کې د سېلاب له امله د اوښتو زیانونو په اړه کره معلومات نشته، خو د زیانمنو کورنیو سروې یې پیل کړې چې له بشپړېدو وروسته به بېړنۍ مرستې ورته ورسوي.
دغه راز، د لوګر د کرنې او مالدارۍ ریاست مطبوعاتي مسوول عبدالبصیر شاهد هم وایي چې په ازره ولسوالۍ کې د وروستیو سېلابونو له امله کرنیزو فصلولونو ته سخت زیانونه اوښتي دي.
Views: 1
