د کاناډا صدراعظم مارک کارني د اوټاوا په یوه بس کې پر یوې مسلمانې ښځې برید چې د دوشنبې په ورځ ترسره شوې، «د شرم وړ» وباله او په کلکه یې وغانده.
د او، سي ټرانسپورت (OC Transpo) د مسوولینو په وینا، د ځانګړو پولیس افسرانو او اوټاوا پولیسو ته د دوشنبې په ورځ د مازدیګر تر پنځو بجو لږ مخکې د مارچ او ټیرون سړکونو (March Road and Teron Road) ترمنځ د یوې پېښې راپور ورکړل شو، چې په کې یو سړي پر یوې د حجاب اغوستونکې ښځې فزیکي برید کړی و.
کارني په خپل اېکس کې لیکلي: «یوه ځوانه مسلمانه ښځه په اوټاوا کې د عامه ترانسپورت پر مهال له بېدلیله برید سره مخ شوه، چې په کې د کرکې ډکې اسلامستیزې سپکې خبرې او ګواښونه هم شامل وو. کرکه او تاوتریخوالی زموږ په ښار یا هېواد کې هېڅ ځای نه لري. مجرم باید حساب ورکړي او نن زما فکراو احساس له قربانی سره دی. هېڅوک باید زموږ په ټولنو کې د کار یا ښوونځي پر لور د تګ پر مهال د ناامنۍ احساس ونه کړي.»
د اوټاوا ښاروال مارک سوټکلیف (Mark Sutcliffe) هم دغه برید غندلی. هغه په ټولنیزو رسنیو کې لیکلي چې برید د «اسلامستیزو سپکو خبرو او ګواښونو» سره مل و. سوټکلیف وویل: «زه په کلکه دا د کرکې او تاوتریخوالي عمل غندم؛ دا زموږ په ټولنه کې هېڅ ځای نه لري. هرڅوک باید د عامه ترانسپورت یا هر بل ځای په کارولو کې ځان خوندي احساس کړي.»
د کاناټا مسلمانو ټولنې خپل غړو ته د فېسبوک له لارې د خوندیتوب خبرتیا خپره کړه: «د اګست په ۱۱مه نېټه یوه ځوانه د حجاب اغوستونکې ښځه په هغه بس کې فزیکي برید شوې چې د کاناټا پر لور روان و. یو سړی بس ته داخل شو، یوه اسلامستیزه سپکه خبره یې ورو په غوږ کې وویل او پرته له کوم دلیل څخه یې په لوړ غږ څپیړه ورکړه. بیا یې ګواښلې چې د هغې مخ به په کړکۍ ولګوي او وژني یې. هغه د کاناټا په پینفیلډ ډرایو کې له بس څخه کښته شو.»
د ټولنې په وینا، بل مسافر ویلي چې دغه سړی مخکې هم د حجاب لرونکو ښځو په نښه کولو کې ښکېل و او دوی پولیسو ته راپور ورکړی دی.
د اوټاوا پولیسو ویلي چې د ۱۸ یا ۱۹ کلنې مسلمانې ښځې پر ضد دغه برید څېړل کېږي او دوی د شکمن کس په لټه کې دي. د پولیسو د «کرکې او تعصب پر بنسټ جرمونو» ځانګړې څانګه د دې قضیې څارنه کوي او له قربانۍ او د مسلمانې ټولنې له مشرانو سره په اړیکه کې ده څو ملاتړ او معلومات برابر کړي.
پولیس وايي شکمن یو سپین پوستي انګلیسي ژبه ویونکی سړی دی چې عمر یې د شل او دیرش کلونو ترمنځ اټکل شوی، قد یې شاوخوا ۵ فوټه او ۸انچه، لاغر جوړښت لري او ږیره یې لري.
پولیس زیاتوي: «موږ د کرکې یا تعصب هېڅ ډول چلند نه زغمو او مسوول کسان به حساب ورکوي. د اوټاوا پولیس د ټولو اوسېدونکو د خوندیتوب، امنیت او هوساینې ته ژمن دي.»
ښاروال ویلي چې له قربانۍ د کورنۍ او د مسلمانې ټولنې له مشرانو سره یې خبرې کړي. هغه زیاته کړه: «موږ ټول باید د اسلامستیزۍ او هر ډول کرکې پر وړاندې ودرېږو او زموږ د ښار د خوندي کولو لپاره تر ټولو ډېر ممکن کارونه وکړو.»
Views: 150
