له مصره غزې ته د بشري مرستو کاروان په داسې حال کې روان شوی چې په غزه کې د قحطۍ ډېرېدو په اړه خبرداری ورکړل شوی او اسرائیل د ملګرو ملتونو د کاروانونو خوندي تېرېدو لپاره د دهلېزونو رامنځته کولو اعلان کړی دی.
د مصر دولتي ټلوېزیون القاهره نیوز راپور ورکړی چې د بشري مرستو موټرو له مصره د غزې پر لور حرکت کړی دی.
د القاهره نیوز خبریال د مصر او غزې ترمنځ په رفح بندر کې ویلي چې لسګونه موټر چې سلګونه ټنه مرستې پهکې بار دي، د غزې په سوېل کې د کرم ابوسالم بندر (کرم شالوم) پر لور روان شوي دي.
دغه ګام په غزه کې د قحطۍ په اړه د څو میاشتني نړۍوالو فشارونو او بشري سازمانونو له خبرداري وروسته پورته شوی. له سلو ډېرو نړۍوالو مرستندویه بنسټونو د چهارشنبې په ورځ خبرداری ورکړ چې په ټوله غزه کې لوږه د زیاتېدو په حال کې ده.
رویټرز راپور ورکړی چې اسرائیل د شنبې په ورځ اعلان وکړ چې د هوا له لارې یې غزې ته د مرستو انتقال پیل کړی دی.
د سرچینې د معلوماتو له مخې، اسرائیل اعلان کړی چې د غزې خلکو ته د ملګرو ملتونو د مرستو کاروانونو خوندي تېرېدو لپاره به «بشري دهلېزونه» رامنځته کړي او په ګڼ نفوسلرونکو سیمو کې به هم د مرستو د وېش لپاره «بشري وقفې» یعنې د نظامي عملیاتي لنډمهاله درېدل عملي کړي.
اسرائیل ویلي چې د یکشنبې په سهار به په استوګنیزو سیمو او د مرستې رسونې په دهلېزونو کې دغه «بشري وقفې» پلې کړي خو نور جزئیات یې نه دي ورکړي.
ورته مهال، مرستهرسوونکي نړۍوال بنسټونه خبرداری ورکوي چې په غزه کې ۲.۲ میلیون وګړي له لوږې سره مخ دي؛ ځکه وروسته له هغه چې اسرائیل دې سیمې ته له مارچ میاشتې راهیسې د ټولو لومړنيو توکو پر لېږد بندیز ولګاوه، هلته خوراکي توکي د ختمېدو په حال کې دي.
د راپورونو له مخې، په مې میاشت کې مرستې له سره پيل شوې خو له نوو محدودیتونو سره.
اسرائیل ادعا کړې چې غزې ته یې کافي خوراکي توکي پرېیښي خو تور یې پورې کړی چې ملګري ملتونه یې په وېش کې ناکام دي. خو ملګري ملتونو یې په ځواب کې ويلي، د اسرائیل تر محدودیتونو لاندې یې یوازې تر ممکن حده عمل کړ دی.
ملګري ملتونو د پنجشنبې په ورځ اعلان کړی و چې په غزه کې «بشري وقفې» به د مرستو د چټکتیا لامل شي او زیاته یې کړه چې اسرائیل تر اوسه د مرستو کاروانونو لپاره کافي لارې نه دي جوړې کړې او دې موضوع مرستو ته د لاسرسي مخه ډپ کړې ده.
د غزې د روغتیا وزارت ویلي چې په تېرو څو اونیو کې ګڼ شمېر کسانو د خوراکي توکو کمښت له امله ژوند له لاسه ورکړی دی.
Views: 2
