نړۍوالو مرستندویو سازمانونو په یوه ګډه اعلامیه کې خبرداری ورکړی چې د اسرائیل د بندیزونو له امله د غزې خلک سختې لوږې د مرګ له ګواښ سره مخ کړي او له حکومتونو یې غوښتي چې په دې اړه بېړنی اقدام وکړي.
بېپولې ډاکترانو، د ماشومانو ژغورنې (سېف د چلډرېن) او اکسفام د یوې ګډې اعلامیې له لاسلیکوونکو دي چې پهکې ویل شوي، د دوی همکاران او هغه خلک چې دوی یې خدمت کوي، «ورو ورو له منځه تلونکي دي.»
۱۰۹ بشري سازمانونو د چهارشنبې په ورځ په خپره کړې اعلامیه کې ویلي: «لکه څنګه چې د اسرائيل د حکومت محاصره د غزې خلک له لوږې سره مخ کوي، مرستندوی کارکوونکي اوس له همدې د خوړو وېش ته له ولاړو کتارونو سره یوځای شوي، خپل ژوند په خطر کې اچوي، یوازې دا چې خپلې کورنۍ ته خواړه برابر کړي.»
بشري سازمانونو خبرداری ورکړی: «ډاکټران د شدیدې خوارځواکۍ کچې د بېساري لوړېدو راپور ورکوي، په ځانګړي ډول په ماشومانو او ډېر عمرلرونکو کسانو کې. ناروغۍ لکه شدید اسهال خپور شوی، بازارونه تش دي، کثافات هر ځای پراته دي او لویان له لوږې او د اوبو له کمښته پر سړکونو پراته دي.»
د بيبيسي د راپور له مخې، یو مرستندوی چې د رواني ملاتړ خدمات وړاندې کوي، د ماشومانو پر روحیې د دغه وضعیت د ناوړه اغېزو په اړه ویلي، ماشومان خپلو میندو او پلرونو ته وایي، غواړي جنت ته ولاړ شي، هلته خو خواړه شته.
د روغتیا نړۍوال سازمان ویلي، د دوی ارزونې ښيي چې د غزې یوه پر څلورمه برخه وګړي له قحطۍ سره ورته شرایطو کې ژوند کوي، او نږدې ۱۰۰ زره ښځې او ماشومان له شدیدې خوارځواکۍ کړېږي چې ژر تر ژره درملنې ته اړتیا لري.
بشري مرستندویو سازمانونو هم ویلي، ملګرو ملتونو راپور ورکړی، د مې له ۲۷مې راهیسې چې د اسرائیل او امریکا له خوا ملاتړ شوې د غزې بشري بنسټ د مرستو وېش متنازع بدیل سیسټم پیل کړی، د خوړو ترلاسه کولو پر مهال د اسرائیلي پوځ په ډزو کې له ۱۰۵۰ ډېرو فلسطینیانو ژوند له لاسه ورکړی دی.
یادو سازمانونو ویلي چې د غزې نږدې ټول نفوس بېځایه شوی او اوس یوازې د سیمې په هغه لږ تر لږه ۱۲ سلنه برخه کې ایسار دي چې هلته نه د اسرائیلو د تخلیې امرونه پلي شوي او نه هم پوځي زونونه دي. دوی وايي، دغه وضعیت د مرستو رسولو عملیات ناشوني کړي دي.
Views: 3
