د ۲۰۲۵ کال د جولای پر ۱۰مه، د انګلستان په برمنګهم ښار کې د ملي مرکې لومړنۍ غونډه ترسره شوه. په دې مرکه کې له برمينګهم او د برتانيې له نورو ښارونو څخه تر پنځوسو زيات د افغانانو ملي، سياسي، علمي او ټولنيزو شخصيتونو، د ټولنو او بنسټونو مشرانو او استازو ګډون کړی وو.
دا غونډه د لندن او برلين د مرکو په تسلسل په نړيواله کچه د افغانانو د سلا مشورو د لړۍ یوه برخه وه، چې موخه یې په افغانستان کې د سولې، یووالي، او پرمختګ لپاره د افغانانو په مشرۍ او د افغانانو لپاره د يوه ټولګډونه ملي بحث له لارې د يوې ګډې لارنقشې او ملي اجماع رامنځته کول و.
د مرکې پیل د قرآن کریم په مبارکو آیتونو وشو چې د مرکې په فضا کې یې د روحانیت، درناوي او یووالي روحيه خپره کړه. ورپسې، د ملي محور په استازيتوب حنیف الکوزي د پرانیستونکې وينا پر مهال ټینګار وکړ چې افغانان باید د باور، یووالي او ګډ لید د رامنځته کولو لپاره لاسونه سره یو کړي.
ډاکټر شریف ظریف د ملي مرکې د نوښت، اهدافو، جوړښت، او پایلو په اړه هر اړخیزه رڼا واچوله. هغه ټینګار وکړ چې دا بهیر باید روڼ، ټولګډونه او له افغان واقعیتونو سره سم وي، تر څو د سولې او عدالت پر بنسټ یو با ثباته راتلونکی تضمین شي.
د مرکې بحثونه په څو ناستو کې د ډاکټر سمیع جوره، فرید رحیمي، او ډاکټر ایاز صافي له لوري تسهیل شول. د مرکې لومړۍ ناسته د ملي مرکې يا ملي خبرو اترو د لید، اصولو، او اهدافو په اړه وه. ګډونوالو وویل چې دا بهیر باید د ولس مالکيت وي او د ولس له لوري پرمخ ولاړ شي، نه دا چې یوازې د مخورو له لوري، او باید په رښتیني توګه د ټولو افغانانو غږونه پورته کړي.
دويمه ناسته د ملي يووالی، سولې او پرمختګ لپاره د افغانانو هڅو ته او په دې لاره کې ستونزو او حل لارو ته ځانګړې شوې وه او درېيمه ناسته هم د هېواد په برخليک کې د بهرمېشته افغانانو د ونډې او ننګونو په اړه وه.
په وروستیو بحثونو کې د ملي مرکې د بهیر پر وړاندې پر ننګونو او ونډې تمرکز وشو. ګډونوالو د افغانانو د خواره واره توب، پر سیاسي بهیرونو د خلکو د بې باورۍ، او د افغانانو ترمنځ د همکاریو اړتیا ته اشاره وکړه. د بهر مېشته افغانانو ترمنځ د همغږۍ اړتیا د خبرو يوه مهمه موضوع وه.
د مرکې په وروستۍ برخه کې ګډونوالو پر دې خبرې وکړې چې څنګه راتلونکي ګامونه مشخص، همغږي او هدفمند وي. وړاندیزونه وشول چې د ملي مرکې سیمهییزې څانګې او کميټې جوړې شي، ګډ پیغامونه منظم شي، او یو باور يوه داسې فضا رامنځته شي چې د ملي مرکې بحثونه پکې دوام ومومي.
ډاکټر خسرو سنگر وال د وروستي بحث لنډیز وړاندې کړ او ویې ویل چې د برمنګهم د مرکې پایلې به د نړۍ په نورو ښارونو کې د ورته مرکو له پایلو سره یو ځای شي او د لويو ملي طرحو په توګه به له ولس سره شريکې شي او له دې سره به د ملي مرکې بهیر ورځ په ورځ پیاوړی کېږي.
د غونډې په پای کې ګډونوالو د “برمنګهم سیمهییزې څانګې” د جوړولو ملاتړ وکړ، څو ملي بحثونه نور هم وغځېږي او د ځایي افغانانو غږونه واورېدل شي. دا غونډه د هیلې، ژمنتیا او د یو باعزته راتلونکي لپاره د ګډ مسؤلیت له احساس سره پای ته ورسېده.
Views: 93
